Babu Kular Khongjirem.
Dang ha kine ki khyndiat sngi mynta, u Chief Minister ka Meghalaya, U Conrad Sangma u la pynbna paidbah ba ka sorkar jylla jongu ka MDA-II kan siew tulop noh ia ki nongtrei ha baroh ki lai tylli ki District Council, kata, ha JHADC, KHADC bad ha GHADC. Kane ka jingpynbna kyrkieh bad kynsan kynsan ka sorkar jylla ban siew tulop noh ia ki nongtrei jong baroh lai (3) tylli ki District Council ka la pynlyngngoh bad pynkyndit lut ia kiba bun ki paidbah jong ka jylla jongngi.
Haba ka sorkar kan pyllut ban siew tulop ei da ki 20/30 klur ha ka shi bnai khlem ka jingiohnong ne khlem da mang lypa ha ka Budget ne khlem da don lypa ka Planning ba janai kam dei satia ka kam kai. Dei ban don ka jingthmu bad ki jingkwah ka sorkar naba rieh ne na lyndet halor kane. Ka sorkar ka la iohi ia ka jingtlot jong ki District Council ha ka liang ki kam pisa tyngka ha baroh lai (3) tylli ki District council na kata ka daw, ka la sdang ban thaw buit ban shim kabu halor kane ka jinglong mynta. Kane ka jingtyrwa kan longkam tang ia kito ki District Council kiba pdiang bad kohnguh ia ki kyndon bad ki jingkwah jong ka sorkar. Kumba la pynpaw u Chief Minister, lada ki kohnguh bad mynjur, ka sorkar kan buh ne thung da u Ophisar ba heh kyrdan uban peit bad pyniaid ia ki kam pisa tyngka jong ka Council khamtam ia ka tulop ki nongtrei lem bad ki jingkamai pisa jong ki Council. Une u Officer heh um dei ban duna ia ka kyrdan IAS ne MCS uba la tbit bha ha ka kam pisa tyngka. Kan long malu mala thik kumjuh kumba la leh da ki Consultancy ha ka state Government.
Ki paidbah bapli kim tip ei ei ia ka ki jingthmu barieh jong kine ki Consultancy. Hynrei, kim dei pat ban klet ba ka sorkar ka la kwah eh ban wanrah lynti rel ha Meghalaya. Ka jingkwah jongka sorkar ka la long shaba palat. Imat da ka bor ka lah ban pyndonkam. Tangba, dang donbok pat ba ki pyrshah bad ieng skhem ki Seng bhalang jongngi halor kane. Ki Consultancy nabar ki la sdang sa ban pyrshang ban thaw lad bad thaw buit pat da kaba thaw ne shna noh ia ka ain kaba khlain bor bha ban ioh knieh jaka lyngba kita ki Company heh ha kane ka jaka jongngi. Ha kane ka ain ekjakor, shisien ba la ioh jaka kine ki Company heh, ym don shuh kino kino ki bor ban tuklar ia ki. Hynrei,kane ka buit tuh ruh ka la phiel. Kine ki Consultancy ki la sdang ban thaw buit laitphew jait tang ban ioh knieh bad pynngam noh ia ka Hok ba kyrpang jong ka Ri jongngi. Kane ka burom bad jingiaroh baroh ka leit sha ki Seng bhalang bapher bapher ki bym ailad satia tdot ban pynduh bad pynjot noh ia kane ka ri baieit jongngi.
Mynta pat, kynsan kynsan, ki kwah sa ban riam lyngba ki District Council. Ki tip bha ba, ban jop bad ioh pyniaid mon katba mon ia ki ‘riewlum tribal, dei sa tang lyngba ki District Council namar dei kine kiba bat bad pyniaid ia ki riti ki dustur, ka niam ka rukom, ka khyndew ka shyiap, ka khaii ka pateng nalor bun kiwei pat ki kam kiba ktah ia ka iap ka im jong ka jaitbynriew rit paid jong ngi. Shisien ba, kane ka buit jong ki Consultancy ka la treikam bad jop ia ki Districts Council, la eh ban khyllie biang bad ka ri jong ngi kan ym don jingkyrmen shuh, kan sa duh kan sa dam noh bad kan sah sa tang ha ki khana pateng (history) jong ki pateng hadien ha bud.
Kumba ka long mynta, imat, ia ka GHADC ha Garo Hills bad ka JHADC ha Jaintia Hills ym da don jingeh than ba kin jop da kine ki buit sianti namar ka NPP ka ioh ban synshar ia ki. Kaba kham jwat te, dei hangne ha KHADC ba la synshar da kawei pat ka party VPP. Kane ka party kan hap ban pyrkhat bha bunsien shwa ban ryngkoh ioh long pynban kumba die tad bad die lilam ia kane ka ri Khasi-Jaintia ba ieit ki blei.
Balei siew tulop noh ka Sorkar Jylla ia ki District Council?
