Shillong: Ka dorbar shnong Lower Lumparing kala phah mih noh ia u nongkhaïi drok na ïing ba u sah wai bad ka la ai por shi taiew.
Haba kren mynta ka sngi ka 26 tarik Nailar 2025, u secretary ka shnong u bah Rostan Shabong ula pynpaw ia ka jingkyndit hadien ba ki pulit ka ANTF kila ioh kem ia u nongkhaïi drok uba sah wai hapoh ka shnong.
Ki pulit ka ANTF kila ioh kem mynta ka sngi ia u Rohit Baruah, 29 snem, u sah ha Dongshiliang, Lower Lumparing halor ka jingdonkti ban khaii drok.
U bah Rostan ula pynpaw ia ka jingai khublei ia ka jingtreilang ka KSU Laban ban lap ia une u snar nongkhaïi drok.
Ula ong ba ka shnong ka la buh kyndon ba ki trai ïing kiba ai wai iakum kine ki briew, kan shim kam namar ba ka shnong ka ju ai ka jingpynbna da ka tynghung ha shnong sha baroh ki trai ïing ba kin bud ia ki jingbthah ka shnong.
Ha kajuh ka por, ki nongialam ka Seng Kynthei Lower Lumparing ka la pynpaw ia ka jingkyndit ba u don u nongkhaïi drok hapoh ka shnong.
Ka President ka Seng Kynthei kong A Wahlang, kumjuh ka Assistant Secretary kong Melda Nongspung, bad ka Vice President kong Arti Lyngdoh ryngkat ki dkhot ka Executive Committee, kila pynpaw ba kim ju mutdur ba ka shnong kan don ki kam sniew khamtam kiba khaii drok.
Kane ka jingpynpaw ki nongialam ka seng kynthei ka long hadien ba ki pulit ka ANTF kila ioh kem ia uwei u bar jylla uba tip kyrteng kum u Rohit Baruah, 29 snem halor ka jingdonkti ha ka kam khaii drok, uba sah wai ha katei ka shnong.
Kila rai ban iatreilang kham jur bad ka dorbar shnong ban rat dyngkhong ia ka jingsniew ha ka shnong jongki khamtam kaba la wanrah ka jingma ia ki khun samla. Kila kyntu ia ka bor shnong ba kan kham pyrkhing bha ia ki trai ïing ba kiba wan shong ïing wai, ki dei bud ia ki jingbthah ka bor shnong khnang ban ym ioh rung ki riew sniew.
Ha kajuh ka por, u President ka KSU Madan Laban u samla Kevin Nelson Wanrap ula ong ba ka seng ka ai khublei ia ka ANTF kaba la ioh kem ia une u snar nongkhaïi bad ka seng kan iai peitsiar ban thwet ia ki runar.
Ula ong ba ka seng ka dang thwet shuh sa ia ki katto katne ngut kiba ka la ishan khmat kiba ju mlien ha kane ka kam beain.
Mih noh na shnong hapoh shi taiew, ong ka Lower Lumparing ia u nongkhaïi drok
