Shillong: Uwei u YouTuber ula shah rong kynsan wut ha ka wah katba u dang ring video ha kshaid Duduma ha Odisha ka Korapur Disstrict.
Ia une u Youtuber la tip kyrteng kum u Sagar Tudu, 22 snem na ka shnong Berhampur ha Ganjam district.
Katkum ki pulit u Sagar ula leit kai sha Korapur bad u paralok jongu u Abhijit Behera ban pyni ha YouTuber Channel jongu ia katei ka jaka jngohkai hynrei ula kynduh pynban ia kane ka apot. La iathuh ba kane ka la jia ha ka por ba ki dang ring video da u Drone ha katei ka kshaid.
Na ka jingjur u slap, ka sorkar ka la pyllait ia ka um na ka dam Machakunda ha Lamtaput hadien ba la pynbna paidbah kiba sah sharum.
U Sagar uba dang ieng halor mawsiang hajan ka kshaid, ula kyndit hadien ba ka um ka la kiew kynsan. Kiba iohi kila iathuh ba ula iaksaid halor u mawsiang ba btuid shwa ban shah rong ha ka wah. Ki briew kiba wankai bad ki don ha katei ka jaka, kila pyrshang ban iarap ia u hynrei khlem lah leh eiei.
Ki pulit na Machakunda kila wan wut wut sha katei ka jaka ban wad ia u hynrei haduh mynta khlem pat lap ia u.
Katba dang ring video, rong ka wah wut ia u YouTuber
