Shillong: Ka Khun Hynniewtrep National Awakening Movement (KHNAM) ka la ong ba ka rukom ai Labour Clearance Certificate ka KHADC sha ki bar jylla tang na kaba pynshisha na ki Pan card, Epic card bad Adhaar, kam pat biang ban khanglad ia ka jingbuhai shnong ki nongwei ha ka kyrteng jong ka jingbylla.
Ka KHNAM ka la aiti ruh ia ka dorkhas ha u Executive Member ka Trade ka KHADC mynta ka sngi, ka 21 tarik Nailar 2025, halor kane.
U Working President ka KHNAM u bah Thomas, ula ong ba ka Council kam dei ban pynshongnongrim tang na kitei ki kot ki sla, hynrei kadei ban bishar ba ia ki kam ba la lah ban trei da ki trai Ri Trai ymdei ban ai ia ki certificate khnang ba kan iarap ia ka iohkam iohjam ki trai jylla.
U bah Thomas, ula pynpaw ruh ia ka jingsngewkhia ba ki bar jylla ki lah ban aplai online ia ki labour certificate na ka sorkar jylla, da kaba shong na Bihar, UP ne na kiwei ki jylla.
Ula ai jingmut ia ka Council ba kadei ban ialeh ban iakhun ban pynduh ia ka rukom leh online ha ka ban ai ia ki labour certificate namar kane kan pynsuk bad kan plie lad ia ka jingbuhai shnong jong ki nongwei ha ka jylla.
Ha kajuh ka por, ula ong ba ka seng kan sa phah ia ka jingthoh sha ka sorkar jylla ba kam dei ban ai ia ki Labour License lyngba ka online namar kane kan plie lad ia ki bar jylla ban wan buhai shnong ha kane ka jylla.
Ula ong ba ym lah ruh ban tip katno bad kumno ki bar jylla ki leit phai ynda la dep ban trei kano kano ka projek bad lehse bun kiba sdang sa ka kam die madan ruh khlem leit phai shuh sha la ka shnong.
Sangeh ban leh Online| Ynda la dep ka kam bylla, lehse ki leh da ka die madan ruh: KHNAM
