Shillong: Ka Hynniewtrep Youth Council (HYC) mynta ka sngi, 21 tarik Nailar 2025, ka la iakynduh ia ka Joint Labour Commissioner ban dawa ba kadei ban bthah ia ki Infiltration Check Gate ba kim dei ban pdiang ia ka Acknowledgement Slip (AS) kaba ki bar jylla ki pyni ha ki khyrdop talasi.
U President ka HYC u bah Roy Kupar Synrem, ula ba ka seng hadien ba ka la pynlong ia ka jingpeit pyrman bad ap miet ha ki khyrdop talasi, ka la lap ba bun ki bar jylla kiba wan bylla ha kane ka jylla kim don ia ka Registration Card (RC) bad ki don tang ia ka Acknowledment Slip ban pyni ba ki la aplai.
U bah Roy ula ong ba ha u 2020 ka sorkar ka la shna ia ka ain jong ka Meghalaya Identification, Registration (Safety & Security) of Migrant Workers, Act ha kaba la kdew ba ki bar jylla ha shwa ba kin wan trei ha kane ka jylla ki dei ban rejistar shwa ialade ban pynshisha ba kidei ki nong India. Hynrei kaba lyngngoh ka long ba ka seng ka lap ba ki don bun ki jingdkoh ha ka rukom pyntreikam ia kane ka ain namar ba bun ki briew kiba rung ban wan bylla ha kane ka jylla, ki don tang ia ka Acknowledgement slip kaba pyni tang ba ki la aplai ia kane ka RC.
Ha kajuh ka por , u President ka HYC, ula kam ba ka seng ka la lap ba ki don shibun ki kot ki sla kiba la shu shna thok bad pyndonkam bakla bad la kynnoh ruh ba ka la don ka jingiadie iathied ia ki RC bad ki Acknowledgment Slip.
Ula ong ba ka seng ka dawa ba ia kine kiba shna thok kiba die tuh bad kiba pyndonkam bakla ia ki RC, ka sorkar kadei pynlong ia ka jingtohkit bad ban pynshitom ia kine kiba donkti ha kane ka kam beain.
Halor kane, u bah Roy ula ong ba na ka liang jong Joint Labour Commissioner ka la pyntikna ba kin sa shimkhia ban pynbeit ia kane bad ka tnad Pulit.
Rung suk ki nongbylla nabar tang da ka ‘AS’ sha Meghalaya, ong ka HYC
