Shillong: Ka Shillong Lajong FC, kaba bat ruh ia ka nam kum ka lahduh, ka la lah ba kan pynliem ia ka Malki SC da 5-0, haka lympung ialehkai ka Shillong Premier League (SPL) ba la long hynne ka janmiet, ha SSA Stadium First Ground, Polo.
Kane ka jingjop kaba hynne ka janmiet ka Lajong ka la wan hadien ba ha ka jingiakhun ba nyngkong ka jong ka ha kane ka lympung, ka la lah shwa ba kan shu iakhaid da 0-0 pyrshah bad ka Rangdajied United FC.
Ka jingjop da kane ka kynhun lah ruh ban ong ba ka la wan hadien ba ki player ki jong ka, ki la long ryntih kum ka kynhun, ha kaba ki la lah ba kin ia mir bha hapdeng para player, ka rukom ban pashat ne ban pynbuh bol, ka da long kaba itynnad , kaba ki la sdang ban tynjuh bor bha ia ka kynhun ialehkai ka Malki, kaba la wan rung sha kane ka jingiakhun kaba ar ka jong ka da ka jingjop pyrshah ia ka ia ka Laitkor SC da 1-0.
Ka khana jong kane ka jingiakhun ka long ba ka la bam por shiteng kynta ia ka kynhun ialehkai ka Lajong ba kan sdang ban ioh pynkhih ia ka jar, ha kaba ka kol kaba nyngkong , la thep ia ka da u Mebannangkiew Thabah (31) bad san minit shwa ba ka jingiakhun kan jam sha ka jingiashongthait, ka Lajong ka la ioh ba kan thep ia ka kol kaba ar lyngba u Emanbha Marbaniang (39) bad dei lyngba kane ka kol, la iohi shai kdar ia katta ka khurai (gap) jong ka rukom ialehkai hapdeng kine ki ar kynhun.
Haba wan ban bteng ia ka kylla miet ka kynhun ialehkai ka Lajong kaba la skhem bha ka rukom ialehkai ka jong ka, ka la ioh ba kan thep syndet ar kol tang hapoh hynriew minit, ha kaba u Ribor L Lyngdoh ula ioh ba un thep ia ka kol kaba lai (47) bad ba la bynrap biang da ka kol kaba saw kaba la wan biang na u Emanbha Marbaniang (51).
Kine ki kol, ki la nang pynskhem shuh shuh ia ka rukom ialehkai ki player ka Lajong bad ia kakol kaba san bad kaba khatduh la thep ia ka da u Firstborn Khongsit (84).
Ha kane ka jingiakhun, u Franklin Surong rang ap kol ka Malki SC ba long u namtam ha ka por ba la iakhun pyrshah ia ka Laitkor, u la pyrshang katlah katiai, ban ieng iada ia la ka kynhun, pynban ha kaba kut um lah ban shan slem hadien ba ki rang ialehkai ba shakhmat ka Lajong, hynne ka janmiet ki la pynpaw ia ka buit bad ka sap ialehkai kaba kynsai bha ka jong ki.
Haba shim kyllum, ka jingjop ka Lajong, ka long kaba paka bha ia kane ka kynhun, kaba khreh ba kan jam shakhmat ha ki jingiakhun kiban wan, hynrei ka kynhun ialehkai ka Malki, ka donkam ban pyrkhat bad puson bha ialade ba da kumno kan bteng ba kan iakhun ia ki jingialehkai kiba dang sah ki jong ka, namar bun bah ki bynta ka donkam ba kan pynkhlain ne pynjanai ia la ka rukom ialehkai, lada ka thrang ba kan kynjoh sha ka kyrdan iakhun jong ka Super Cup, namar ha kane ka samoi ka lympung iakhun jong ka SPL ka long beit tang shi kylla (single leg).
Da kane ka nam jop, ka Lajong joit kan kiew sha ka kyrdan kaba ar, hadien ba ka la ioh ba kan khur 4 point.
Lashai ka sngi, ka jingiakhun kan long hadpeng ka Langsning FC pyrshah ia ka Rangdajied United FC, kaban long ha ka por 4:30 nohphai sngi.
Pynbam jem ka Lajong ia ka Malki 5-0
