Shillong: Ka Khasi Students Union (KSU) Laban Circle ka la kyndit ia ka jingthet kti ka tnad Forest ba kam dei ka jaka jongka ha Mahadev Khola, namar ba dei maka hi, kaba ai jingbit ban shna ia ki jingtei ha Mahadev Khola.
Ka Deputy Commissioner ka East Khasi Hills, mynta ka sngi Balang ka la khot ia ka jingialang ia ka KSU Laban circle, ki pulit, bad ki pandit na Mahadev Khola ban iakren ia katei ka jaka, hadien ba ka KSU ka la ujor pyrshah.
Haba kren sha ki lad pathai khubor, u President ka KSU Laban circle u samla Reuben Najiar ula ong ba ka KSU kam pyrshah ia ka mandir hynrei ka pyrshah ia kito ki briew kiba sah ba ki dei ban mih na katei ka jaka namar ba katkum ka dulir ha u snem 1923, kaba la ai sngewbha ka sorkar phareng ka long tang ban shna mandir, ym ban long trai ki pandit ne jongno jongno ia katei ka jaka.
U la ong ba ka jingthet kti ka Forest Department kaba la tip baroh shi katta ia katei ka jaka kum ka Protected Forest, ka la pynlyngngoh ia ka seng. Ula ong ba ka Forest Department ka la ong ba ka phah shithi sha ka seng ba katei ka jaka kam hap ha ka tnad Forest hynrei kaba lyngngoh ka long ba baroh shi katta, la ai jingbit hi ka Forest Department, kumno mynta kynsan kynsan, haba mih jingeh, ka niat sha ka tnad Revenue.
U samla Reuben u la ong ba katkum ka RTI kaba la ioh ka seng, ka trai jaka ha katei ka jaka, ka dei jong ka tnad Forest namar ba ka sorkar kam ai kano kano ka jinglong trai iano iano.
U la ong ba ki don 64 ngut ki pandit bad ki khun jongki kiba sah ha katei ka jaka bad ka jingma ka long ba ki briew ki wan sah ha katei ka jaka na kylleng ki jaka khlem kot khlem sla.
U la ong ba kane kam dei ka nongkynti jongki, kim lah ban sah namar ba lashai lashi sngi ki khun ki kti jongki kin pyllong jaka sah junom.
Katkum ka jingiathuh u samla Reuben, ka jingialang mynta ka sngi kaba la don lang na ka tnad pulit bad ki pandit, dorbar shnong Lawsohtun, ka la rai ba kino kino ki mat kum ki jingtei kim dei ban bteng haduh haduh ban ioh ia ka rai na ka sorkar.