Shillong: Ha ka jingjia kaba sngew triem bad pynsuhjer ia ki kmie ki kpa bad ia ki khynnah khamtam ki kynthei, kawei ka khynnah skul ka la shah dung ha ki 2 ngut ki runar kiba kah dur khmat hakhmat ka ophis ka Bible Society ha syndah ka Madan Student bad ka Dinam Hall Jaiaw, Shillong.
Katkum ka jingiathuh ka kmie kane ka khynnah kaba 15 snem, kaba dang pule klas X, ka la iathuh ba kane ka la jia ha ka por 2 baje duna eiei ha ka 18 tarik Nailar 2025, katba kane ka khynnah ka dang mut ban leit sha skul.
Ka kmie ka la iathuh ba kine ki runar kila ieng da ka scooty bad kynsan kynsan ki dung da u thyrnia na tyrpeng jongka bad tang kumta, ka la king khlieh bad ka la mareh noh wut katba lah sha Dispensary ha Jaiaw. Ha kane ka jingtieng bad ka jingsyier, kam kynmaw ban peit ia ka number ka scooty ruh.
Jia ryngkhat ha kane ka por ym don briew ba iaid ba ieng, kaba la pyllong ia ki runar ban shim kabu. Kane ka khynnah ruh ha ka jingtieng, kam kynmaw shuh ban pyrta briew sa kawei namar ba kala king khlieh mar synshah dung da u thyrnia injek.
Kane ka khynnah ka dang shah sumar ha Dr. H Gordon Robert Hospital, Jaiaw.
Ka kmie ka la iathuh ba ki pulit kila wan ban tohkit bad ban thwet ia kine ki runar.
La pyrshang ban peit ruh na ka CCTV kaba don ha Synod College, hynrei kam ioh kem namar ba ka a kham jngai ka jaka.
Ka kmie ka la pynpaw ia ka jingsngew sih bad kumban jaw ummat halor kane ka jingjia kaba sngew shyrkhei ha kine ki sngi bad ka la kyntu ia ki kmie ki kpa bad ki shnong ki thaw ba kin long kiba peitngor.
Ka jingjia ia ka khynnah skul, ka la pynsuhjer ia ki kmie ki kpa
