Shillong: Ka jingiakhun ka shnong Dympep ban wanrah bad ban pyllong ia ka jaka jngohkai kaba khuid, naduh ka jingkieng Khongwieng ne kaba ki khot paidbah kum ka jingkieng Mawkdok shaduh Umdiengpoh, ka la iakynduh shibun ki jingeh na ka jingkhlem akor ki briew.
Dang shen ka Hima Sohra ka la pynjari ban khang pyrshah ia ka jingbam khana, bad pyllong ia ka rud surok kum ka jaka shet jaka tiew, kaba la wanrah ka jingjaboh. Ym tang katta, ka Deputy Commissioner bad u Superintendent of Police (SP) ka East Khasi Hills ruh kila pynmih ia ka jingmana ba la khang pyrshah ban bret jaboh pathar bad yn dain kuna 5000 tyngka ia kiba leh pyrshah.
Ha ka jingkren bad kawei na ki longkmie, kaba phah ka shnong ban pynkhuid ka la iathuh ba ki don kiba saitlah bad don ruh kiba kohnguh haba ki pyni ba kim dei ban bret pathar ia ki jaboh. Kaba sngew pang met, ka long ba ki jaka riat bad kham kynjah, ki don kiba pyllong kum ka jaka bret jaboh bad la don ruh kiba wan bret khnang haduh 5-6 byrni ki Huggies kiba bret khnang, nalor kiwei kiwei ki jaboh.
La iathuh ba kine kiba wan bret ia kum kine ki jaboh da ki byrni ki lah ban dei ki para Khasi hi namar ba ki jaboh ba ki tourist kiba nabar, ki ju bret ki dei kynrei eh kum ki plastic. La iathuh ba ki jait bitor kyiad lei, la shlei ha kiba bun ki jaka b awa bret ki briew.
Katkum ka jingiathuh, man ka sngi, 2 byrni ki jaboh la ioh tam tang hapoh u pud u sam ka shnong Dympep.
Ha kajuh ka por, u Sordar ka Dympep, u bah Hamsing Nongkhlaw ula ong ba la pynkhuid ar sien shi taiew bad ka shnong ka hap ban siew bai nong ia ki. U la ong ba ka shnong ka la bthah ruh ia ki ba lada lap bad iohi kiba bret pathaw, dei ban bat bad dain kuna hynrei ka jingeh ka long ba ki briew ki wan briew jaboh ha ka por mynmiet.
La iathuh ba ka sorkar kam don kano kano ka jingtyrwa ban iarap hynrei dei tang ka NEEPCO dang shen, ka ai jingiarap 2 ngut ban pynkhuid tang ha sawdong ka jingkieng khongwieng ne jingkieng Mawkdok.
Da ki byrni wan bret Huggies ki briew ha thain Dympep, don kiba saitlah, don kiba kohnguh
