Shillong: Ka Khasi Students’ Union (KSU) South East Central Circle (SECC) bad ka Federation of Khasi, Jaintia and Garo People (FKJGP), Riwar Circle, ha ka 16 tarik Nailar 2025, ha ka jingialam u samla Basuklang Khongwar u Vice President, KSU, SECC bad u Evanfield Khonglam, President, FKJGP, Ki la ioh ban pynieng ia ki Radium Retro Reflective Tape ha shi lynter ka rud surok naduh na poh Laitlyngkot haduh ha Mawlieh kaba hap hapoh ka Package 2.
Kine Reflective Tape ki iarap ia ki kali ban ithuh ia ka surok namar ba ki thaba bad pyni ding ha ka por mynmiet bad ha ka por bad um.
Kane ka jingmih shakhmat kine ki ar seng ka dei hadien ba ki iohi ia ka jingshim sting bad leh bymsuidniew ka kompeni ia ka jinglongshngain bad ka jingsuk ka iaid ka ieng jong ki paidbah.
Kine ki arseng ki lah ia kren la bunsien bad ki bor ba dei khmih sha ka sorkar bad kumjuh ruh ia ka kompeni kaba dei ka contractor ha kane ka jingtrei ia ka surok Shillong- Dawki Road hynrei ha man ki sien sam ba ia kren ki shu kohnguh tang ka khlieh. Kumta, kine ki ar seng kila mih sha madan ban thung hi noh da la ki jong ki signal na ka bynta ka shngain bad ban pynsuk ki nongleit nongwan ha ka thain Pynursla Sub division.
Kine ki ar seng ki maham tyngeh ruh ia ka kompeni kaba trei ia katei ka surok bad ia ka sorkar ba ki dei ban pynbit pynbiang ia ka jinglongshngain ka surok khamtam eh ba kin peit bniah ia ka jingshngain u paidbah la ka long ha ka bynta ka jingtwa khyndew ne ha ka bynta ka jinglong jingman ki rud surok, lym kumta kin shim da kawei pat ka sien jam kaba kham tyngeh pyrshah ia ka company ne ia ka sorkar.
Da ki Reflective Tape buh ka KSU, FKJGP Riwar ha lynter ka surok Pynursla ban shngain ka leit ka wan ki kali
