Shillong: Shi bynta ban pynsngewbha ban pynsngew tynnad ia kiba iaid lynti, kiba iaid kai ha ka thain Khyndai Lad, ka sorkar jylla ka la wanrah da ka jingrwai ba bang ba thiang ha jaka kaba la pynkynriah ia ki nongdie madan.
Ia kane ka sur jingrwai, kaba ai kyrteng ka Lynti Sur Bathiang ne Musical Evening, la pyllait mynta ka sngi da u myntri rangbah u Conrad K Sangma ryngkat u myntri ka tnad jngohkai bah Paul Lyngdoh.
U Conrad u la ong ba ka sorkar ka la don ka jingmut ban pynitynnad ia kane ka surok ha Khyndai Lad bad ha kiwei ki jaka, bad lyngba kane ka jingpyllait ia kane ka Lynti Sur Bathiang, kan plie lad ia ki samla ban pyni ia ki sap jongki, lyngba ka Meghalaya Grassroot Music (MGM) ha kaba ka sorkar kan leh ha kiwei kiwei ki jaka ruh.
U myntri Rangbah ula kyntu ia ki paidbah ban ai ka jingiatreilang bad ka sorkar na ka bynta ka jingbha jingbit jingbiang.
Ha kajuh ka por, ula ong ba ka sorkar kan sa pynitynnad shuh shuh ia ka Khyndai Lad ha kaba kan buh ia ki ding sawdong.
Yn pynbha ruh ia ka jaka na ka bynta ka jingdonkam u paidbah hadien ba la pynkynriah ia ka Assembly.
Shwa ia kane, la ioh ruh iaka jingkren na u myntri ka tnad jngohkai ka jylla, u Paul Lyngdoh.
Ha jaka ba kiw kiw kaw kaw, mih ka ‘lynti sur bathiang’
