Shillong: Ka dorbar synrai ka ïing dorbar thawain ka jylla Meghalaya kan neh san sngi ban sdang ha ka 8 tarik bad kan kut 12 tarik Nailur 2025.
Haba kren hadien ba la wai ka Business Advisory Committee (BAC), u Nongialam ka Liangpyrshah u Dr. Mukul Sangma, ula ong ba watla ka dorbar ka long kaba lyngkot hynrei ki dkhot ka ïing kin sa rah shibun ki mat kiba ktah ia ka jylla.
U la ong ba katto katne tylli ki mat, la buh hakhmat ban rah kum ka liangpyrshah bad un iakren ia ki paralok na ka seng VPP, ban peit kaei kaba dei ban rah ha ka dorbar.
Katkum ka jingong u Dr. Mukul, ka jingkyrduh kam kyrduh jam, ka jingleh shiliang ia ki kam pynroi, ka jingdkoh ka tnad ka koit ka khiah, ka tnad pule puthi bad kiwei.
U Dr. Mukul ula ong ba un rah ia ka mat halor ka jingeh jong ka Garo Hills Autonomous District Council (GHADC) ha kaba la 42 bnai, kim pat ioh ia ka tulop, naka jingleh kuman ka sorkar jylla.
Ula kynthah ia ka jingkynnoh u myntri rangbah ka jylla u Conrad K Sangma halor ka GHADC, da kaba ong ba katkum ka Sixth Schedule, ka dei ka kamram ka sorkar jylla bad ka sorkar pdeng ban peit ia ki jingeh ki District Council ha Meghalaya, hynrei ka jingkyntait u Myntri Rangbah ka dei ka jingiaid lait ia ka jingkitkhlieh katkum ka riti synshar ka ri.
Ka liangsynshar ka don 51 ngut ki MLA katba ka liangpyrshah ka don 9 ngut kynthup 5 ngut na ka TMC bad 4 ngut na ka VPP. Ka liangsynshar ka don ka UDP 12, HSPDP 2, BJP 2, Independent 2, NPP 33.
Ngan iakren ia ki paralok VPP ban iakren ia ki mat ha ka dorbar synrai : Dr. Mukul
