Shillong: U symbud myntri rangbah ka jylla u bah Sniawbhalang Dhar ula kynthah ia kito kiba kren dait ia u Myntri Rangbah u Conrad K Sangma ba ki dei ban bishar ia ki kam ym ia ki ktien.
Haba kren ha ka jingplie maw kyrteng ban pynbha ia ka Iewduh ha ka 13 tarik Nailar, 2025 ha Iewduh, u bah Sniawbhalang ula ong ba ar bnai mynshwa haba u Myntri Rangbah u Conrad u wan jngoh nyngkong ia ka Iewduh bad bam jadoh ha kawei ka dukan, ki don kiba kren dait ia u da kaba ong wat bam tang ka ja doh, hynrei ai da ka skhim bad mynta u Myntri Rangbah ula leh ia kaei kaba u mut, um ju heh tyngam hynrei u shu pyni beit da ki kam.
Haba kynthoh ruh ia kiwei ki nongialam seng sain pyrthei kiba ju wan jngoh ia ka Iewduh, u bah Sniawbhalang u la ong ba bun ki nongialam ki wan peit ia ka Iewduh, ia ki paidbah hynrei ki wan tang ban pan vote katba u myntri rangbah u wan ban sngap ia ki jingeh jong ki nongshong iew bad ki paidbah bad leh ruh da ki kam.
U la ong ba bunsien, ka sorkar MDA-2 ka pynduna ia ka ktien, bad ka pynjur da ki kam. Hadien ar bnai, ba la wan jngoh ia ka Iewduh, u Myntri Rangbah ula wanrah 13 klur tam ban pynbha iaka Iewduh.
U bah Sniawbhalang ula ong ba la kyrmen ba ha kawei ka sngi, ka Iewduh kan long kum ka Iewduh Square kaban iarysiem bad kum ka Times Square ha New York.
Ki kren dait ba bam jadoh u MR, kiwei ki nongialam ki rung Iewduh ban pan vote, u MR u sngap ia ki jingeh jongki: Sniawbhalang
