Shillong: Katba u Rahul Gandhi ula ong ia ki para dkhot ka Congress ba kumba 48 tylli ki konstitwensi ka Lok Sabha kiba dei ban jop ka Congress, kila shah rem ha ka BJP, na ka jingshah tuh ia ki vote, ka Congress ha kane ka sngi Baar ka la pynbna ruh ban pyllong ia ka jingiakhih ha kylleng ka ri pyrshah ia ka Special Intensive Revision (SIR) bad ka jingleh thok.
Kane ka jingiakhih kan long shi bnai kynthih ban lum kumba 5 klur ki jingsoi na ki nongtrei party kiba kwah ban wanrah ia ka jingpynkylla lyngba ka sur jong uba bun pyrshah ia ka jingpynjot ka BJP ia ka synshar paidbah.
Ia kane ka rai la shim ha ka jingialang ki General Secretaries, ki nongkitkam ki jylla bad ki nongialam jong ka Congress ha ka jingpyniaid u president u Mallikarjun Kharge ha kaba la iashim bynta ruh u Rahul Gandhi, uba dei u nongialam ka liangpyrshah ha Lok Sabha.
Shi sngi shwa ka sngi laitluid ka ri, ha ka 14 tarik Nailar, u nongialam ka Congress u Venugopal ula ong ba kan don ka jingiaid paidbah ryngkat ki mombati ha man ki district katba ka rally halor ka ‘Vote Chor, Gaddi Chhod’ kan long ha baroh ki nongbah jong ki jylla ha ka ri hapdeng ka 22 tarik Nailar bad 7 tarik Nailur.
Ba shah tuh vote, pynbna u Rahul Gandhi ban pynkhihwin ha ka ri
