Shillong: Kiba ha ïing u samla Pynskhemlang Kharkhrang ki la sah ha umdum bad shaiong ngain namar ba ka met jong u, kam shym la paw ne per sha sla um wat hadien ar taiew kynthih ruh.
U samla Pynskhemlang Kharkhrang, 25 snem na ka shnong Umroi Nongrah, Ri-Bhoi la iathuh ba ula ngam jyllop ha ka 26 tarik Naitung 2025 ha pung Umiam.
Ha ka jingleit kynduh u nonglum khubor bad kiba haïing jong une u samla ha Umroi Nongrah, kila pynpaw ia ka jingsngew lyngngoh haduh katta katta ia ka jingjia ia une u dkhot ka ïing jongki, namar ba haduh mynta ba la iaid sha ka ar taiew kynthih naduh ba ula jah, kam per satia ka met jongu sha sla um, kumba jia ia kiwei.
U bah Kronding Nongbsap, u bakha ula iathuh ba kumba ju iohi, kiwei kiwei kiba ngam jyllop, ki la per hadien katto katne sngi katba u samla Pynskhemlang pat khlem per bad khlem lap dien eiei.
U la iathuh ba man ka sngi, kiba haïing ki leit peit sha ka pung Umiam ioh kan per kan mih hynrei khlem iohi dak eiei haduh mynta.
U bah Kronding ula iathuh ba kiba haïing kila leit pyntip sha ki pulit halor kane ka jingjia, bai oh kin don ka lad ban lap ia u samla Pynskhemlang khnang ba kin ioh noh ia u.
Lah ban kdew ba ka bor sorkar ka la hap ban sangeh noh ban wad ia u samla ha pung Umiam hadien ba kim lap dien satia ia u wat hadien ba la ngam palat 200 phut ryngkat ki tiar ki tar kum ki camera ba khlain bor shapoh ka pung Umiam bad 7 sngi kynthih.
U Chief Executive Officer ka District Disaster Management Authority (DDMA) u bah Shanlangbor Warjri, MCS, u la ong ba katkum ka jingai jingmut jong ki NDRF, SDRF bad S&RT ka jinglap ia ka met ka dei ban long ar sngi ne 48 kynta, lada ym dei ba ka met ka shah woh ne shah ban ha ki maw ne sahkut shapoh, ka la dei ban per sha sla um. Hynrei kaba lyngngoh ka long ba u bah Pynskhemlang um shym la per sha sla um bad kawei pat ka lah ban dei ba shah dait ha ki dohkha namar ba ka met u briew ka don lyer bad haba khlad ka per sha sla um hynrei lada shah pynpei ne shah pong ka met ba ka la jem, ka lah ban ym per shuh sha sla um.
Sah umdum kiba haïing, man ka step leit peit ioh per ka met ha pung Umiam
