Shillong: Ka sorkar jylla ka la ithuh ne pyllong ain ia ka jingshet kyiad um tynrai da ka rukom shet kaba shu pdem ne fermented liquor. Mynta ka sngi, ka sorkar kala pynkylla ia ka Meghalaya Excise Rules 149 A, da kaba bsuh ia ki rule thymmai ban ai License ia kiba shet kyiad tynrai kiba shu pdem.
Ka jingialang ka kynhun myntri mynta ka sngi ka la mynjur ban ithuh ia ka rukom shet kyiad um tynrai da kaba shu pdem kaba khot ha ka ktien phareng kum ka Fermented Country Liquor.
Ha kane ka jylla ki Khasi-Garo ki don ka sap ban shet kyiad katkum ka jingstad bad ka jingshem buit jongki naduh mynshwa da kaba pyndonkam da u khaw. Kumta, shi bynta ban kyntiew ia kito kiba don ha kane ka sap, ia ka rukom bam rukom dih tynrai bad ban pynioh ia ka kamai kajih, ka sorkar ka la mynjur ia ka rukom shet kyiad tynrai ha kane ka jylla.
Hynrei ka jingshet kyiad phareng ne distilled liquor kam kynthup ha kane ka ain jong ka sorkar.
Kane ka kyiad kaba ka sorkar ka ai license ka long kito kiba shet da u khaw ba khot u bitchi uba dei u khaw ba ju shet kyiad ha Garo Hills, apong u khaw ba ju shet ha Arunachal Pradesh, u judima uba jushet kyiad ha Assam bad kiwei katkum ka rukom shet tynrai.
Ka kyiad pdem kam long beain shuh, kiba shet kin ioh da ka License
