Shillong: Ka khlieh rangbahkur ba mihkhmat ia ka Synjuk Ki Rangbah Kur: Ka Bri U Hynñiewtrep ki la leit ia kynduh ia u Bah Shemborl;ang Rynjah, Khlieh Rangbah jong ka Dorbar Thawaiñ Dalariti Rilum Khasi na ka bynta ban ai ka jingkyrshan ba pura ha ka mokotduma PIL ba la ujor da ka seng Syngkhong Rympei Thymmai. La pynsngew ia ki nia ban iasaid na ka bynta ban pynneh ia ka riti kheiñkur kheiñkha na ka kmie da u sangot kja synjuk Bah Rapionglang Blah, u ba la batai bniah shaphang ka saw ika sian ba takhuh ka imlang sahlang lyngba ka rukom mushlia da ki kynhun ki ba angnud ban kylla noh ia ka riti dustur sha ka ba aijait sha u kpa ne sha u shynrang. U Bah R L Blah u la kdew ia ka lanot ha u snem 2014 ha ba ka Kliar Iingbishar ka Jylla (Meghalaya High Court) ka la thmu ban pynduh ia ka iktiar jong ki rangbahshnong bad iuhroit ki Dorbar Shnong.
U la kren mardor ba ka kur lei lei ka dei ka daw ka ba kham khraw ia ka jaitbynriew ka ba ktah naduh ka riti bat khyndew haduh ka riti jied longsan mansan ha ki shnong ki raij bad ki Hima ryngkat bad kiwei kiwei ki snap riti dustur ki ba ym lah ban lait na ka kam kur. Nalor kata la pynsngew ruh ba ka don ka jingma ia ka imlang sahlang ha ka pateng ka ba hadien ban sa kynrei ka shong sang ha ka pouikha poiman lada la duh noh ka tipkur tipkha. La pynkut nia ba ka daw ba tynrai jong ka mokotduma ka long ban iasaid na ka bynta ban ioh ka syrnot iada riewlum (Schedule Tribe Certificate) ia ki briew ki ba aijait sha u shynrang.
Ha ka ba iadei bad kata ka jingkwah syrnot iada riewlum, u Bah Raphael Warjri u la ban jur ha ki artylli ki mat ba ka Syngkhong Rympei Thymmai ka dei ka seng ka ba thmu ban kylla syndon ia ka riti kheiñkur kheiñkha na ka kmie sha ka ban aijait noh sha u shynrang bad ka ba pynksan ba ka rukom aijait ka dei kat ha ka mon jong ki longiing longsem shimet. Hynrei la kynthoh juir ba ka SRT ka thrang ban kylla noh ia ka riti dustur ban ryngkat bad ki paidbah ba la kham kiew kyrdan ym iahap ba kin dang dawa ia ka syrnot iada paid riewlum. La banjur ruh ba ka jingsngew kyllum ha kano kino kino ki paidbynriew ka dei ban bud ryntih ha ka imlang sahlang bad ym dei da ka jingsngew shimet jongno re jongno ki ba khwan jait sha lade.
Ki dkhot rangbahkur ba la ialam da u Bah R L Kharpran kum u khlieh rangbah bad synran da u Bah Rapiong Lang Blah, Bah Manstudy Nongrem, Bah Raphael Warjri, Bah Aristotle Lyngdoh, Bah Ploster Syiem, Bah Kyrmen Uriah bad Bah Wilbert Shylla, ki la ieng rangbah da kawei ka sur ba ka Synjuk ka kloi ban aikti ia ka Dorbar Thawaiñ Dalariti Rilum Khasi ha kane ka bynta ban aireng ia ka jingthmu jong ka Syngkhong Rympei Thymmai ki ban pyntroiñ ia ka jaitbynriew.
Kyrshan Ki Dorbar Kur Khasi Ia ka KHADC pyrshah ia ka Mokotduma ka Syngkhong Rympei Thymmai
