Shillong: Ka Sur Paidbah South West Khasi Hills ka la ai dorkhas ha u Myntri Rangbah ka jylla u Conrad K Sangma ban pynheh noh ia ka surok sha ka two lane ne intermediate road na Weiloi shaduh Keniong ka South West Khasi Hills District.
Ha ka Sur Paidbah South West Khasi Hills, ki don ki seng sain pyrthei bapher bapher nalor ki sengbhalang da kaba buh ia ka politik sharud bad ban trei na ka bynta ki jingdonkam u paidbah.
Ha ka jingleit aiti dorkhas mynta ka 06 tarik Nailar 2025, sha u myntri rangbah, la don lang ki nongialam na ka NPP, ki MLA ka UDP, ki sengbhalang ruh kumjuh.
Kila dawa ban shna pynheh noh ia ka surok kum ka intermediate road na Weiloi shaduh Keniong namar ba ki bynta kiba hap ha East Khasi Hills na Mawphlang sha Weiloi la dep ban shna pyndep.
Kane ka surok ka long kaba donkam haduh katta katta ia ka South West Khasi Hills district ban iaid lyngba shaduh Ranikor ha kaba ki shnong kiba don ha ka district kin ioh jingmyntoi.
Katkum ka jingiathuh, ka jingshna na Weiloi sha Keniong kan sa urlong shen kaba lah ban dei na ka pisa ka World Bank ha ka jinglut kaba T.200 klur bad sa na Keniong sha Ranikor kaba don kumba 20km, yn sa leh ha ka bynta kaba ar.
Khlem leh politik, iatreilang ki seng sain pyrthei, sengbhalang ban dawa surok sha SWKH
