Shillong: Ka Supercare Hospital ka la rakhe ïa ka Sngi Ai Buiñ da kaba pynlong kawei ka prokram kaba kyrpang kaba thmu ban pynsaphriang jingtip sha ki paidbah shaphang ka jingkongsan jong ka jingaibuiñ na ka bynta ka kmie bad i khyllung.
I Chief Guest jong katai ka jingïalang i dei i Dr. R.S. Thangkhiew, iba dei i Managing Director jong ka Supercare Hospital. I la ong ba ka phang shaphang ka jingaibuiñ ka long kaei kaei kaba ki briew ki kiar ban ïa kren,/kaba la ieh ha ka jingdum, hynrei mynta ka long kaba kongsan bha ban kren shaphang kane. I la ïaroh ïa ki lad jingïarap kiba ïarap ïa ki paidbah ban tip shaphang kane ka phang.
Ha kane ka jingïalang, ka Supercare Hospital ka la pynmih ïa kawei ka kot kaba kyrteng, Ka Kot Ai Jingbatai Halor Ka Jingaibuiñ. Kane ka dei ka kot banyngkong eh ha ka jylla kaba ai jinghikai ïa ki longkmie kiba ai buiñ. La thoh ïa kane ka kot da i Dr. Anamika Mall, iba dei i doktor ba dei peit ïa ki khyllung (Pediatrician bad Neonatologist) ha Supercare Hospital, bad la thoh khnang ïa kane ka kot ban pynïapher hapdeng ki jingngeitbeij/jingngeitbieit bad ki jingshisha halor ka jingaibuiñ. Kane ka kot ka don ha ka ktien Phareng bad Khasi, bad ka thmu ban ai jingstad ïa ki kmie, ki longïing, bad ki nongsumar da ki rukom bad ki jingmlien ba la pynshong nongrim ha kiei kiei ba la pynshisha.
Ha katai ka jingïalang, la don lang ruh i Dr. Emisaka Sumar, iba dei i doktor ba dei peit ïa ki kynthei kiba armet bad ki jingpang kynthei (Obstetrician bad Gynecologist), bad ruh i Bah Damien Marwein, iba dei i Chief Operating Officer jong ka Supercare Hospital, bad ka jingdon ryngkat jong ki ha kane ka jingïalang ka long kaba kyrpang, namar ka pynskhem ïa ka jingaiti jong ka hospital halor ka jingsumar ïa ki longkmie bad ki khyllung khynnah.
Kane ka jingïalang ka la pynshai ïa katto katne ki jingngeit ba bakla bad katto katne ki jingtip bakongsan, kum shaphang ka jingdonkam ban ai tang da ka buiñ kmie haduh hynriew bnai ka jingim i khyllung, bad ruh shaphang ka jingkordor jong ka dud colostrum kaba mih tang ha katto katne ki sngi banyngkong hadien ba kha khyllung, kaba i Dr. Mall i khot ïa ka kum “ka tika/injek banyngkong jong i khyllung.” Ka ban ruh ïa ka jingkongsan ban kyrshan ïa ki longkmie kiba leit trei, da kaba batai shaphang ka buiñ ba la khem bad pynlang lypa, ka jingbuh bha ïa ka, bad kumno ki kmie ki lah ban ïai ai ka bam kaba tei ïa ki khyllung jong ki watla ki hap ban mih na la ïing ban leit trei.
Ha kane ka jingïalang, ka don ruh ka jingïasnoh kti lang bad ka NICE (Nurses Initiative for Community Empowerment) bad ka ANEI (Association of Nurse Executives India), kaba ïarap ban pynbha shuh shuh ïa ka jingai jingsumar ïa ki paidbah, bad kaba ïarap ruh ïa ki nos ban nang kiew shuh shuh ha ka kam jong ki.
Ka Supercare Hospital ka ïai bteng ban ai jinghikai, jingkyrshan bad jingpynshlur ïa ki longïing, kaba long kum shi bynta jong ka kam jong ki ban ai jingsumar ïa ki paidbah. Ka jingrakhe jong kane ka sngi kam dei tang ka jingïalang, hynrei ka long ruh ka sienjam ban wanrah ka dustur kaba kyrshan bad kheiñkor ïa ka jingaibuiñ.
Ka Supercare Hospital ka rakhe ïa ka sngi ai buiñ da kaba saphriang jingtip bad ai jinghikai
