Shillong: Mynta ka sngi, u nongialam ka liangpyrshah u Dr. Mukul Sangma ula ialam ia ki MDC ka TMC sha ïing sah u Lat ka jylla ha Raj Bhavan, Shillong ban pynsngew ia ki jingeh ba ka Garo Hills Autonomous District Council (GAHDC) ka iakynduh ha kine ki sngi.
Kine ki mat ba kila pynsngew ha u Lat ki long ka jingpynwai kynsan ia ka dorbar kyrpang kaba 14 jong ka GHADC khlem ioh iakren ia ki mat ba kongsan jong ka Council
Ka jingbym don ka Business Advisory Committee (BAC) ha GHADC, kala pyllong ia ka
Executive Committee kaba ialam ka NPP ban shu thom naphang haduh ban shu pynwai khlem dei por ia ka dorbar ruh.
Ka TMC ka la kyntu ia u Lat ban pyntreikam ia ka Para 16 ka Sixth Schedule ban khot ia ka dorbar kyrpang jong ka Garo Hills Autonomous District Council na ka bynta ban iakren ia ki mat jong ka jaitbynriew Garo.
Kila pynsngew ruh ia u Lat ban tuklar ban pyllait noh ia ka tulop kaba la sah haduh 42 bnai ia ki nongtrei ka GHADC.
Kila pynpaw ruh ba ka jingbym pyntreikam ia ka soskular lai mamla kaba la iasoi ha u 2014 hapdeng ka sorkar India, ka sorkar jylla bad ka seng lehnoh barim ka ANVC-B.
La pynsngew ruh ha u Lat ba un tuklar halor ka jingdonkam ban pyllong ain noh ia ki riti dustur jong ka jaitbynriew Garo, khnang ban iada bad ban pynneh pynsah ia ka jinglong kyrpang jong ka jaitbynriew Garo namar ba watla ka Council ka la pass ia kane ka ain hynrei ka dang sahteng haduh mynta ha ka tnad District Council Affairs Department ka sorkar jylla. Kila kyntu ia u Lat ba un shim khia namar ba lada kam ioh ia ka jingmynjur u Lat hapoh bnai, kan sa kylla kot jot noh.
Kiba kynduh ia u Lat hapoh ka jingialam u Dr. Mukul ki kynthup ia u Cherak W Momin, Lahitson D Sangma, Alphohsush Marak, Rinaldo Sangmá, ka Sadhiarani Sangma, Agassi Marak bad u Pardinand Shira.
Ialam u Dr. Mukul khrui ia ki MDC sha u Lat ban pynsngew ia ki jingeh ka GHADC
