Shillong: U nongialam ka Congress u bah Manuel Badwar ula ong ba naduh ka MDC elekshon u bah Ronnie V Lyngdoh ula ai dak ban rung NPP.
U la ong ba ka NPP ka khlaiñ bha ban tan ia ki MLA da ka bor jong ka pisa.
Haba kren mynta ka sngi, u bah Manuel ula ong ba kaba sngew synei ia ki paidbah ka Mylliem namar ba kila shah shet kylla ha u MLA uba phet jyndat noh tang shiteng lynti bad ula kynthah ba lada ki nongialam ki kloi ban shet shukor ia ki paidbah, kan long ka jingma kaba khraw ia ka lawei ka jylla.
Haba pynpaw ia ka jingsngewkhia halor kane, u bah Manuel ula ong ba katba ka jylla ka dang sahdien ha kiba bun ki liang, ki politishian pat ki lapmiet ban pyrkhat tang ia ka jingmyntoi shimet.
Ula ong ba haba ioh ia ki nongialam kiba khwan myntoi kan long kaba eh ia ka jylla ban kiew bad ka party kan wad da ki nongialam kiba thymmai bad ula kynnoh ba ha ka MDC elekshon kaba dang shu dep, u bah Ronnie um shym la iarap eiei ia u kyrtong ka Congress bad ula leh sting haduh katta katta.
Halor ka jingujor pyrshah ia ki 3 ngut ki MLA kynthup Dr Celestine Lyngdoh, bah Charles Marngar bad bah Gabriel Wahlang kiba phet na ka party sha ka NPP, ula ong ba ka party kan sa buddien namar ba u bah Ronnie uba dei u nongujor pyrshah ia ki hynrei ula leit rung lang ialade sha kajuh ka sem.
“Mynshwa dei u bah Ronnie uba ujor pyrshah ia ki haba ki rung sha ka NPP hynrei mynta pat ula leit rung sa ialade”, la ong u bah Manuel.
Halor ka kam nongialam ha ka MPCC ba ka party ka tlot na ka jinglong President u bah Vincent H Pala, u bah Manuel ula ong ba ka party kam don kano kano ka jingtlot bad kam mut ba tang ba rem elekshon ka dei ka jingtlot jong u nongialam.
U bah Ronnie ujor ia ki 3 ngut ba ki phet na Cong, mynta ula rung lang ialade
