Shillong: Ka Meghalaya Swimming Association (MSA) ka la wan shakhmat ba kan sei madan ia la ki khynnah nong jngi ki jong ka, kiban khreh ban mihkhmat ia ka jylla sha ki artylli ki lympung iakobh jngi kiban sa long ha kine ki khyndait sngi kiban sa wan.
Ha kaba nyngkong, na ka liang ka MSA ka la pynbna ia ki kyrteng jong ki khynnah kiban mihkhmat ia ka jylla sha ka 41st Sub-Junior National Swimming Championship kaba la buh ba kan long ha ka 4 bad ka 5 tarik u Nailar ban wan, ha sorbah Bengaluru, kaba ha kane ka kynti, ka MSA ka la lah ba kan sei madan ia arngut ki nongiashim bynta bad kine ki long Keanan Chugim Nongrum Momin bad Anisha Phanbuh, katba manager ka kynhun yn dei bah Mark H. Nongrum.
Katba ha ka lympung iakhun jong ka 51st Junior National Swimming Championship kaban long ha ka 3 haduh ka 7 tarik Nailar pat ha Ahamedabad, ka MSA ka la lah ba kan sei madan haduh 9 ngut bad kane ka kynthup ia Elberz Kharbani, Shaun Maxwell Diengdoh, Wanshan Ia U Allya,Elhanan Kharwar Rumnong, Meiai Pynsan Lyngdoh Tron, Verem Gedaliah Nongsiej, , Em-I Rta Ksoo, Meshwa Na I Nikhla Siangshai, Syngrang Batngen Marbaniang bad manager ka kynhun yn dei bah Jonathan Dunnai.
Haba iadei bad kane ka jingleit ban iashim bynta, ka MSA ka la pynlong ia ka jingiakynduh lang mynta ka nsgi Palei ha pung jngi ha Crinolone, ha kaba ka la ioh ba kan ai ia ka kitbok ka kitrwiang ia ki khynnah, ia kaba la ai da bah Kenneth Wahlang Vice President, bad bah B. Lyngdoh Secretary bad ba la don lang ruh bah Joe Marwein Technical Director, bah Maxillian Lyngdoh Treasurer, ki dkhot ka synjuk bad ba la don lang ruh ki kmie ki kpa jong ki khynnah.
Sei nongjngi ka MSA ban ia aireng sha Bengaluru bad Ahmedabad
