Babu Kular Khongjirem.
Katba nang mih ki sngi ki bnai bad katba nang tyllun sha ka general MLA elekshon 2028, katta, bun ki MLA bad politishian (politicians) ki la sdang kyndeh shadem bad suh snier jan man ka sngi bad man ka miet.Ki la sdang wad lad wad lynti bad khein jingkhein politics ruh (political calculation) sha kano ka ing ka sem (political party) ban leit swait ban ioh rung ing kaba kham pahuh ka ja ka doh bad ki jingbam bang jingbam thiang kyrhai.
Ha kine ki shi snem tam mynta ruh, don haduh kumba lai (3) ngut ki MLA Congress kiba la ryngkang dieng kper ban leit rung thymmai noh sha kawei pat ka ing paki-dulan. Kim ngeit ba ki shah pynngop sha kata ka party ba ialam ia ka sorkar (ba ki paidbah kim da mon ne sngew tynnat than) hangne ha Meghalaya da ka jingkyrmen skhem ruh ba ka kam Minister te,khlem pep bad khlem artatien shuh kin ioh beit thik thik mar ia leit rung. Phewse! Ynda la rung, ym don ba khein briew pynban ia ki. Lada ki dei makna ba ki dei ban ioh minister namar ba ki dei bad mihkhmat na ki District bym pat don minister, hynrei,shisien ba la ngat ha ka jingriam (political trap), mano ban pyrkhat ia kata ka seniority ne jinglong District. Ki la shu sah hi mynta tang kum ki MLA ryngkang dieng kper politics (defectors). Tip shuh haduh katno kata ka ing thymmai kan phyrnai bad pyn phuh pyn phieng shisha ia ka constituency jongki,ym lah ong ne ym lah batai ia kata, tang ki briew jong ka constituency jongki kiba lah ban ai jubab kham bha halor kata.
Hynrei,kaba kham phylla pat mynta kalong, ba,ynda la ngat ki lai ngut ki MLA congress,sa uwei biang u MLA congress ba sah marwei ruh,u la kwah leit lang syndon shata. Ka ktien ki riew stad ka ong,’Ngi sngew shngain shibun lada baroh baroh ki ia liat lang ha kajuh ka thliew”. Ki nang mut ba ki poi sha ka jaka ba biang bad jaka ba shngain ia ki ba kin jop suk ia ka MLA elekshon ha u snem 2028, Phewse! kam long satia kaba suk ia ki ba kin jop suk kumba ki mut dur..Kim tip ba ki la ngat pynban ha ka jingriam kam paidbah ne political trap. Shisien ba la ngat,shitom ban khie khlieh biang sa shi sien ia kajuh ka kam.Ka apot sepngi ia ka lawei jongki (political career) kan long lypa kaba dum hakhmat u paidbah.Shisien, ba U Blei u mut ban pynjot, u da pyn lamwir shwa. Shisien ba la bakla khein jingkhein (mis-calculation), lah eh ban pynmih soh (uncertain for further success). Kaba kham ma kalong ba ioh ka dei pynban ka jingpyn jot hi da lade ialade (self-political sucide). Namar ha ka jingkwah briew jongngi,kam ju urlong satia kumba thmu. Mut ia kaba bha, poi sha kaba sniew bad mut ia kaba dei, poi pynban shaba lait. Ki paidbah ki la sdang ialap ne iathuhkhana te, mynta khyndiat khynsoit shaphang ka general MLA elekshon 2028.
Shisien ba la bakla khein, lah eh ban pynmih soh, ioh long pynban ka jingpynjot hi
