Shillong: U MLA ka Mylliem u bah Ronnie V Lyngdoh ula ong ba ula rung sha ka NPP khlem kano kano ka kyndon.
U bah Ronnie uba la jop lai sien na Mylliem kum u MLA na ka Congress, ula leit pyniasoh noh sha ka NPP mynta ka sngi da kaba aiti ia ka shithi ha u Lamphang u Thomas A Sangma rynghkat ka jingsynran lang ki nongialam ka Congress na man ki shnong kiba hap ha Mylliem konstitwensi.
Haba kren hadien ba la pyniasoh sha ka NPP, u bah Ronnie ula ong ba ka dawbah kaba la pyllong ia u ban rung ka dei namar ba ka konstitwensi Mylliem bad ki paidbah ki donkam ia ki kam pynroi pynsan bad ban tuid ki kam pynroi, ka donkam ban don ha ka sorkar kaba leh bha bad trei ia u paidbah.
Ula ong ba ka jingrung jongu sha ka NPP kam don kano kano ka jingbuh kyndon ban ai shuki myntri ne ban ai ticket MLA ha ka elekshon 2028 hynrei ka dei beit shisur na ka bynta ki kam pynroi.
Da kane ka jingrung u bah Ronnie sha ka NPP, ka Congress kam don MLA shuh ha Assembly bad ka NPP ka la kiew sha ka 33 ngut ki MLA ha ka ïing kaba 60 ngut.
Shwa ia kane, 2 ngut ki MLA ka PDF kynthup u bah Banteidor Lyngdoh bad u bah Gavin Mylliemngap kila pyndam noh ia ka party bad iasoh noh sha ka NPP.
Phet bak u bah Ronnie na ka Congress ba khring ki kam pynroi ka NPP
