Shillong: Ka Meghalaya High Court ka la bthah ia u Advocate General bad ia u nongiasaid ain jong u nongujor ia ka jingktah na ka jingpynkhyllem ia ki dieng ban pyniaid ia ka Ropeway Cable Car na lum Shyllong sha Laban.
Kane ka jingbthah ka High Court ka long ban bishar bad ban peit ia ki lad ki lynti kiba lah ban leh na ka bynta ban thung dieng biang ha ki jaka kiba shah ktah na ka jingpyniaid ia ka Shillong Peak Ropeway Cable Car Project.
Ha ka jingshong bishar mynta ka sngi halor ka Public Interest Litigation (PIL) kaba la ujor da u bah Geraldine G. Shabong, halor ka jingktah na ka jingpynkhyllem ia ki dieng ha ka thain Lawsohtun.
Na ka liang ka sorkar jylla ka la jubab ba ka jingpynkhyllem ia ki dieng ka long katkum ka jingbit kaba la ioh na ka sorkar India katkum ki kyndon, hynrei na ka liang u nongujor ula pynphai nia ba ka dei ka kamram ka sorkar jylla ban thung dieng biang haba ka pynkhyllem ia ki khamtam ba ka Meghalaya ka dei kawei na ki jylla kaba leh sting bha ban thung dieng ha ka ri.
Ka kynhun ki nongbishar kynthup ia u Chief Justice I.P. Mukerji bad u Justice W. Diengdoh, ka la sngewthuh ba wat la ka sorkar jylla ka mynjur ban shim ia ki lad ki lynti ban thung dieng biang ha ki jaka ba shah ktah katei ka projek hynrei ka la pynpaw ruh ia ka jingeh na ka jingbym ioh jaka.
Khnang ban pynbeit ia kane ka jingeh, ka Kashari kala bthah ia u Advocate General bad ia u nongiasaid ain na u nongujor, u Paul ban leit jngoh bad jurip lang ia katei ka jaka bad ban aiti ia ka kaiphod sha ka kashari halor kiei ki lad ki lynti ban leh ban thung dieng biang sawdong ki jaka ba shah ktah na ka jingpyniaid ia ka Ropeway Cable Car Project.
Ka la bthah ruh ia ka sorkar jylla ban pynbiang ia ki jingdonkam ha ka por ba ki leit jurip ia kitei ki jaka kum ka bam ka dih, ka leit ka wan bad kiwei kiwei ki jingdonkam.
Ka Kashari ka la buh sngi biang ban shong bishar ia kane ka mukotduma ha ka 14 tarik Nailar ban wan, ban bishar ia ka kaiphod ban aiti da kane ka kynhun.
Phah jurip ka High Court ia u AG ryngkat kiwei ban thung dieng biang na jingktah ka Ropeway Cable Car
