Shillong: Ka Working President ka MPCC ka Debora Marak ka la kyntait ba ka Congress kan khang noh ia ka dukan sain pyrthei ha Meghalaya tang namar ba phet lut ki MLA sha ka NPP.
Haba kren mynta ka sngi halor ka jingphet jyndat u MLA ka Mylliem u bah Ronnie V Lyngdoh sha ka NPP, ka Deborah ka la ong ba ka Congress kan ym khang dukan ha Meghalaya bad ka la pynskhem ba ha Garo Hills ka party kala jop ha ka MP elekshon kaba dang shu dep khlem pyndonkam pisa shi naia ruh.
Ha kajuh ka por, ka la kam ba ki don bun ki nongialam kila kwah eh ban wan iasoh sha ka Congress bad kane kan sa jia shen.
Ha kajuh ka por, ka la ong ba ka party ka la ioh pdiang ia ka shithi phet seng u bah Ronnie bad ka party ka la pdiang ruh ia kane ka rai u bah Ronnie.
Ka la iathuh ba u bah Ronnie ula pyntip sha ka Congress ban mih noh hadien ka jingiasyllok bad ki paidbah ka Mylliem konstitwensi bad ki nongialam ka Mylliem Block Congress.
Ka Deborah ka la ong ba ka party kala pynpaw ia ka jingnguh ia ka jingnoh synniang jong u bah Ronnie sha ka party ha ki snem ba la leit.
Ka la ong ba ka party kam don eiei ban ong ia ka rai jongu, hynrei ka jingleit iasoh jongu sha ka NPP ka shong ha u bad u tip khambha ma u bad katkum ka jingtip, u bah Ronnie u la iakren bad ka NPP la katto katne por mynshwa ba un rung.
Ka la ruh ba ka Congress kan thaw thymmai ia ka party wat haba kam don shuh ki MLA ruh bad kan leit biang sha ki paidbah kiban ai ia ka rai.
Ka la kyntait ruh ba ka don ka jingtlot ha ka kam nongialam ha ka party hynrei ka la ong ba kiba phet na ka party, ka dei namar ba ki shah tan ha ka bor jong ka pisa.
Ka Congress kan ym khang dukan ha Meghalaya, ong ka Deborah
