Babu Kular Khongjirem.
U Myntri sorkar ka sorkar Meghalaya bad uba dei ruh na ka party UDP kaba dei ka paralok ba la pyniaid lang ia ka sorkar(coalition partners) MDA-II ba la ialam da ka party NPP u la antad ba ka jingjah ki thup dewiong haduh kumba 4000 metric ton ka lah ban dei ba shah rong noh ha u slap bah uba jur jong ka Meghalaya.
Kat na ka shyntur u Minister sorkar kan mih kane ka kyntien ka la pynkyndit bad pynlyngngoh lut ia ki paidbah bad bun kiba shu ia ang lyngngoh noh tyngheng kumno ka umslap ka lah ban rong lut kat ia ki thup dewiong ba 4000 metric ton.Don ki paidbah kiba kwah ban ia leit peitkai bad leit shon dur ruh shaduh shaei kine ki thup dewiong ki poi.
Lada don kiba khaii beain ruh, ka sorkar ka dei ban wad haduh ban da shem ne lap.Lada dei ba tuh ki rit ki ria tang shi byrni u dewiong ruh,lah khih ka shnong ka thaw baroh kawei bad ym don jingmap shuh ia ki bapli, bad kin poi beit khlem artatien ha ruh nar(along).Lada dei ki High Level pat,da ki hajar trok(trucks) ruh ka biang beit.Katba nang slem, katta nang biang ia ki namar ka ktien ki riew stad ka ong,’katba nang slem ka jingbishar,katta ka nangjah nangjah ka hok(justice delayed,justice denied).
Kaba donkam eh mynta ka long ba ki liang pyrshah kim dei satia ban shu aili ia kum kine ki raibi ba sniew(bad precedence) ha ka ri jongngi.Dei ruh ban dawa da ka jingwad bniah(enquiry) da ka CBI ne da ki ED jong ka sorkar India ban lap ia ka jingshisha baroh.Lada dei ba rong lut ka um slap ba jur ruh,dei ban da pyni bad ring dur(vedeo) shaduh ka wah ne wat shaduh Assam ne Bangladesh ba twa une u lum thup dewiong uba heh khnang ban sakhu shusha ba ka dei..Lada don ba leh thok lei lei,ka Hok kan sa paw hi ha kaba khadduh.Ki pyrkhat ia ka jingphoh sniew ban jop ia kata ka vthong(target ) ia kata ka 10 billions ha ka state Meghalaya da kaba shim ram(loans) da ki phew hajar klur na ADB bad ka umslap rngai(ghost rainfall) ba kit ei ia ki thup dewiong ba heh,tip shaei kein kan poi ka state jongngi hadien ha bud.
Ki pulit ki ioh jingiaroh ia ka jingtbit jongki ia ki kam sniew jong ka Sonam ba ka la shet kylla ban pyniap ia la u jing u lok,u Raja Rushivanshi, ki la dei ban trei shitom sa ia kane ka jingjah kyndit kyndit ki thup dewiong.Jin lada ki pulit ki jop shisha ban lap ia ka jingshisha sa ia kane ka jingjah noh kine ki thup dewiong heh, lehse, ,ki lah ban ioh jingiaroh bad ioh award syndon ym tang ha Meghalaya hynrei wat ha ri India bad ha ka pyrthei hi baroh kawei.
Shu ia wiat ki paidbah noh rymmuin ba shah rong noh ki thup Dewiong ha u slap bah
