Shillong: Ka Seng Samla Hima Lyngiong ka la ieng pyrshah jur ia ka jingshna Pandal ka kynhun Yatra ha shnong Phanniewlahneng ban sahmiet kiba iaid yatra sha Mawsynram.
Mynta ka lah sngi u Blei, ki nongialam ka Seng hapoh ka jingialam u President bah Winson Kharryngki, kila hiar sha ka madan Iewtih kaba don ha shnong Phanniewlahneng, kaba la shna ia ka Pandal da ka kynhun Yatra ban sahmiet ha katei ka jaka shwa ban leit pat sha krem Mawjymbuin ha Mawsynram.
Katkum ka jingtip, ka jingpynkhreh ban iaid Yatra sha Mawsynram, kan long ha ka 2 tarik Nailar ban wan.
Ki dkhot ka Seng Samla Hima Lyngiong kila pynsangeh noh ia kane ka jingshna pandal bad beh krad ia kiba shna ha katei ka jaka. U President jong kane ka seng samla, u bah Winson ula ong ba katei ka jaka ka dei jong ka Hima Lyngiong bad katkum ka jingiakren jong u bad u Lyngdoh, u khlem ai jingbit ia ka kynhun yatra ban shna pandal ban sahmiet ha katei ka jaka.
Ula kynnoh ba dei tang ka jingai jingbit u Rangbah Shnong ka Phanniewlahneng u bah Sranstar Jaba ia ka kynhun Yatra ban shna pandal ha katei ka jaka khlem ka jingtip ka shnong bad ka Hima.
U bah Winson ula ong ba ka Seng kam pyrshah ia ka jingiaid Yatra hynrei ka jingpyrshah ia ka shnong bad ka Hima, balei ka ai jingbit ba ka kynhun Yatra kan shna pandal ban sahmiet kiba iaid Yatra sha Mawsynram.
Ha ka jingshisha, ha ki snem ba la leit, kam ju don ka jingpyrshah ban sahmiet kito kiba iaid yatra ha katei ka jaka hynrei ha kane ka snem, ka Seng Samla Hima Lyngiong ka la pyrshah namar ba ka la iohi ia ka jingeh ba ka Dorbar Shnong Mawsynram ka la iakynduh haduh ba kane ka kam, ka la poi sha ka kashari.
La sngewthuh ba u Lyngdoh ka Hima un khot iakren bad ka Seng Samla Hima Lyngiong ban iapynbeit halor kane ka kam.
Pyrshah ka Seng Samla Hima Lyngiong ia ka Pandal yatra ha Phanniewlahneng
