Shillong: Ka jingwad ia u rangbah uba la shah rong ha ka umsaw uba na shnong Umtasor, Ri-Bhoi ka dang iaid haduh mynta kaba la iaid sha ka ar sngi kynthih naduh ka sngi u Blei .
Ki paidbah ka shnong Umtasor, ki la iamih paidbah ban leit wad ia u Bah E.B Nongshli, u rangbah uba la shah rong ha ka umsaw uba hap najrong ka jingkieng ha Iewsier bad shah rong ha ka wah Umtrew.
Nalor ki paidbah, ki pulit, SDFR bad Search & Rescue Team ruh kila pyllong ia ka jingwad ia une u rangbah.
Na ka jingiamih paidbah ban leit wad ia utei u rangbah, ka shnong Umtasor, ka la hap ban pynkhreh ia ka bam ka dih na bynta jong kito kiba ngam um ban wad ia utei u rangbah ba jah, ia kaba la pynbit pynbiang da ki longkmie jong ka shnong Umtasor.
U Bah R. Mukhim u Rangbah shnong ka Umtasor, u la ai ka jingkhublei ia ki paidbah ka shnong Umtasor, ia ka shnong Saiden bad kumjuh ruh ia ki bor pulit ka Ri Bhoi, kiba la shimkhia lem ban wad ia utei u rangbah, wat haba kim pat lap haduh mynta.
U la kyntu ia ki bor Pulit, ba kin shimkhia lem bad ban thaw ia ki lad ki lynti, na bynta ban lap noh ia utei u rangbah, namar kum ka shnong hi, ka don ia kata ka jingsngewsih kaba jur eh, ba u riew rangbah na ka shnong ba un shu jah kumto bad khlem lapdien shuh ia u.
Khlem pat lap dien ia uba hap nalor jingkieng ba shah rong ha ka wah Umtasor
