Shillong: U nongaiktien ka sorkar jylla u bah Paul Lyngdoh ula pynbna ba ka sorkar kan sam pisa paidbah sha baroh ki nongdie madan kiba la ioh ia ka Certificate of Vending (CoV) ha ka 5 tarik Nailar ban wan.
Ka sorkar kan sam mar T. 10 hajar ia baroh ki nongdie madan kiba don kumba 407 ngut katkum ka jingkhein ka sorkar bad man u bnai ka sorkar kan ai ruh mar T. 2 hajar na bynta san bnai ia kine ki nongdie madan kiba la shah pynkynriah sha jaka thymmai.
U bah Paul ula ong ba ka sorkar kan shna ruh ia ka painkhana 15 tylli ha ka bynta ba sharum ka parking jong ka MUDA ha Khyndai Lad na ka bynta ki nongdie madan.
Ha kajuh ka por, u myntri ula ong ba ka sorkar ka la rai ba ka Khyndai Lad kan dei ka jaka iaid kjat bad ki kali kiban ioh iaid kin dei tang kito kiba ioh pass kiba sah ha katei ka jaka.
Naduh 7m haduh 9pm yn ym shah iaid kali na katei ka jaka lait noh tang haba don ka jingjia ba kyrkieh.
U myntri ula ong ba ka sorkar kan sdang ban weng noh ruh ia ki nongdie madan na lad Shillong Civil Hospital, na Laitumkhrah bad kiwei ki jaka ha sor Shillong.