Shillong: Ha ka janmiet ka 28 Tarik Naitung 2025 ki dkhot ka Khasi Students Union (KSU) kila hiar bad pynpra naphang ia ki ïing dara ba la sah ki poiwir kiba shu wan naei re naei ha hajan ka Parking ha Paltan Bazar (Cantonment) markhap bad ki shnong kum ka Mawbah bad Nongsohphoh, Upper Mawprem.
Palat kumba 50 ngut naduh ki kynthei, ki khynnah bad ki rangbah kiba la sah beaiñ ha katei ka jaka kaba la isait met haduh katta katta. Ka jingjaboh bad jingsma kaba mih na katei ka jaka ka lah ban ktah ia ka koit ka khiah kiba bun balang. Ki iing sah jongki, ka la long thik kum ki iing ha slum ha kaba la shu ker malu mala da ki plywood bad synduk kot ka jaka kaba khim khlem paiñkhna.
Ha kane ka jingleit kynra ka KSU, ka la lap ba ki mynder kiba sah ha katei ka jaka kim don ki kot ki sla ba biang kum ki EPIC bad kiwei kiwei. Na katei ka ktem, ka la lap ruh ia ki jingdih pynbuaid kum u drok u kynja bad kiwei kiwei de.
Ka Seng ka la lap ruh naduh ki nongkhaïi drok, kynja, kiwei kiwei, ki nongbylla beaiñ ba khlem kot khlem sla.
Ka seng ka la pynher krad syndon ia kine ki briew kiba sah beaiñ ha katei ka jaka bad phah lum shi syndon ia ki tiar ki tar jong ki bad beh mardor na katei ka jaka.
Kane ka jingioh rung beain kine ki briew ka dei ka jingtlot bad ka jingbym don ka Ain̈ kaba paka ban khang lad ia ki poiwir kan buh jingma ia ka jaitbynriew rit paid.
Ka KSU ka la dawa ba ka Sorkar Jylla ka dei ban kyndit bynriew shwa ba ka por kan dier bad ka dei ban pyntreikam noh ia ka ILP khnang ba ka umsaw jong ki mynder kan nym wan tyllep ia ka jaitbynriew. Ka seng ka la buh jingkylli ruh, shano kita ki khyrdop talasi mynder bad haduh lano yn shim khia ïa kane ka mat kaba ktah ïa ka jaitbynriew, la ong ka kyrwoh na u samla Pynshai Rani u Information and Publicity Secretary KSU.
Pynpra bad beh ka KSU ia Palat 50 ngut poiwir na Paltan Bazar
