Shillong: U myntri ka tnad nongkyndong ka jylla u AT Mondal ula ong ba tang ki skhim ka sorkar pdeng kiba la pynjari ba dei ban pyndonkam naphang ne compulsory ia u Aadhaar ban ioh pdiang ia ki jingmyntoi, lym kumta kin ym ioh jingmyntoi.
Ka High Court, Meghalaya ka la pynmih haka hukum ba kito kiba ioh jingmyntoi na ka skhim sorkar, kim dei ban duh lada kim don u Aadhaar ruh hynrei ki lah ban pynshisha da u Voter Card, Pan Card, Passport ruh ban ioh jingmyntoi na ka skhim.
Haba iadei bad kane, u Mondal ula ong ba ka sorkar India ka la buh kyndon ba ban ioh jingmyntoi na ki skhim jongka, ki nongioh bynta ki dei ban don u Aadhaar kum kiba don Job Card, PMAY, khaw reshon, bad kiwei ki skhim.
Hynrei ha kaba iadei bad ki skhim ka sorkar jylla, ym donkam ban da don u Aadhaar namar ba ka sorkar kam pat pyllong uba donkam naphang. U la ong ba katkum ka kyndon ka sorkar India, kito kiba trei ia ka skhim 100 sngi, ki dei ban don baroh u Aadhaar ban pyniasoh bad ka job Card bad lada don tang uwei bym pyniasoh bad ka Job Card, baroh kin iaduh lang ia ka bai nong namar ba ka sorkar pdeng kan ym pyllait pisa.
Halor kane, u myntri ula bthah ia ki Block Development Officer (BDO) jong ki Block bapher bapher ba kin peit ia kane ha ki shnong bapher bapher khnang ban ym kynduh jingeh ki job card ban ioh bai nong kiba la pyniasoh ia u Aadhaar. Wat ia u khaw reshon ruh kin ym shuh lada kim don u Aadhaar katkum ki kyndon kiba la buh ka sorkar India.
Ka High Court, ka la kren shai ruh, ba kane ka mat, ka donkam ia ka jingiatainia kaba kham jylliew, bad kumjuh katkum ka hukum jong ka Supreme Court bad la buh ban shong bishar biang ia kane ka kam, ha ka 12 tarik Nailar 2025.
Lada ym pyniasoh Aadhaar uwei uba don job card, baroh shi shnong kim ym ioh bai nong
