Shillong: Na ka jingkhynra ka Assam ia ki mynder ri, ka la wanrah ka jingsyier ia ka jylla Meghalaya ioh ba kin wan wad jaka rieh sha kane ka jylla.
Halor kane, mynta ka sngi 24 tarik Naitung, 2025, u Myntri Rangbah ka Jylla, u Conrad K Sangma ula lum ia ka jingialang bad ki Ophisar bad bthah ia ki bor District ba kin long kiba peit pyrman, khamtam ha ki jaka khappud bad ka Assam.
Ka Assam ka la pyllong ia ka jingkyndang ia ki mynder ri khamtam ki briew kiba wan rung beain na Bangladesh da kaba pynher krad naphang ha kine ki sngi, kiba la skud jaka tuh ia ki jaka sorkar ha Assam.
U Myntri Rangbah u la ong ba la bthah ïa ki bor district ban long kiba peit pyrman bha khnang ba ki mynder kiba shah beh na Assam kin ym ioh rung sha Meghalaya.
Katkum ka jingong u myntri rangbah, ka donkam ka jingiatreilang naduh ki bor District, ki Pulit, ki Village Defence Party (VDP) bad ki Khlieh Nongsynshar Shnong ban iasam jingtip ha ka por kaba biang bad ban shim ia ki sienjam kiba donkam.
U Myntri Rangbah ula ong ba haduh mynta ym pat don satia kano kano ka jingjia ba wan rung ki briew ba shah kyndang na Assam ha kano kano ka District ka Meghalaya.
Syier ka Meghalaya ba kyndang ka Assam ïa ki mynder ri
