Sdang ka Inter School Karate, wan shim bynta 104 tylli ki skul

Shillong:  Ka lympung ialehkai 31st State Level Inter School Karate Tournament 2025, la sdang iaka mynta ka sngi, kaba ha kane ka kynti kaba mynta ka da kynjoh syndon sha ka rekod jong ka jingwan iashim bynta 350 ngut ki khynnah kynthei bad 392 ngut ki khynnah shnynrang, na ki 104 tylli ki skul ba kynthup na ri lum Khasi, Jaintia bad Garo.
Ia ka pyrda jong kane ka lympung ialehkai ba la pynlong ia ka da ka the All Meghalaya Karate-Do Association (AMKA) ryngkat ka jingkyrshan da ka tnat jong ka Directorate of Sports and Youth Affairs, la plie ia ka ha Multipurpose Indoor Hall ka SAI STC, NEHU.
U kongsan ba la wan ban plie ia kane ka lympung dei u Deputy Inspector General of Police (Eastern Range) Davis NR Marak IPS, katba u symbud kongsan dei u bah John F Kharshiing Working President Meghalaya State Olympic Association (MSOA)
. Katba ia ka jingialam bam smai ki nongwan iashim bynta sha kane ka jingiakob la lam khmat da ka Esaranaki Kharjana, ka thei ialehkai kaba dang shu ioh ba kan khur ia ka takma rupa naka bynta ka jylla ha ka lympung ialehkai jong ka National Cadet Tournament, kaba la long ha Dehradun,  ha u bnai uba la dep.
Na ka liang u Davis NR Marak, ha ka jingkren ka jong u, um lah ban khlem da iaroh ne ban pyrto ia ka AMKA kaba la lah ba kan da pynlong ia kat kane ka lympung bah ialehkai kaba heh tam ha ka jylla, da kaba u la ong ban lah ban lum ban lang haduh 104 tylli ki skul kam dei ka kam kaba suk, kaba da kylla kane ka dei ka dak jong ka jinglen lade bad aiti met bad mynsiem da ki dkhot jong ka AMKA, nalor katta u la ai khublei ruh ia ki coach bad ia ki kmie ki kpa jong ki khynnah, kiba iai kyrshan bad ai mynsiem ia la ki khun ki jong  ki.
Katba na ka liang bah John F. Kharshiing, ha ka jingkren ka jong u, u ieng ban pynkynmaw ia ka jingsdang iaid jong ka por kaba nang jan sha ka lympung ka National Games kaban sa long ha kane ka jylla ha u snem 2027, ha ka juh ka por u kyrmen ba ki nongialehkai karate jong ka jylla kin lah ban paw bad ban tyngshain bha ialade.
Ha kane ka sngi plie ia ka pyrda kane ka lympung, ka AMKA ka la wan shakhmat ban pynkup burom ia ki kato katne ki nongialehkai bad kumjuh ia ki coach kiba la lah ban wanrah ia ka nam bad burom ia ka jylla ha kine ki khyndiat bnai kiba la dep bad kine ki kynthup ia ka Kynjailin Lyngdoh Mawnai, kaba la ioh ba kan khur ia ka takma rnong naka bynta ka ri na ka 9th South Asian Karate Championship, ba la long ha Colombo, Sri Lanka.
Kiwei kiwei pat ki nongialehkai kiba la pynkup burom ki kynthup ia  Ferdinand Samkupar Rani, Gideon Tympuiñ, Gregorwilson Makdoh, Larisha Kurbah, Esaranaki Kharjana, Daphishisha Shadap, Royal Jayden Laloo.
Katba ki coach ba la pynkup burom ki kynthup ia  Donboklang Lyngdoh, Sunil Rathee, Rodrick Syiem, Edwilbert Kyntiewbor Nongkynrih bad Ester Mary Lyngdoh.
Ha shwa ban pynsdang ia ka jingiakhun, ka la don shwa ka demonstration kaba la pyni da ka kynhun ki samla kynthei bad shynrang.