Shillong: U myntri ka tnad bording ka jylla u AT Mondal ula ong ba watla ka sorkar ka la khang ban iaid ki kali kiba palat ia ka jingthew na jingkieng dam, hynrei dang don kiba pyrshang ban leh tam.
Haba kren halor kane mynta ka sngi, u Mondal u la ong ba kane ka jingpyrshang ki nongniah ban iaid jubor ban pynjot ia ka khilon ne ka gate, kam shym la long kaba seisoh namar ba ka sorkar ka la buh ia ki pulit ban pahara baroh 24 kynta nalor ka don ka khilon kaba la shna ba tang ki kali kiba hapoh ka jingthew, ki lah ban iaid bad kumjuh ka CCTV ruh kila treikam baroh 24 kynta ban peitngor ia kiba leh tam.
Ula ong ba ynda la dep ka jingkieng kaba dang shna ka PWD, kan pyllait na ka jingeh jong ki kali ban iaid na katei ka jaka.
Ka sorkar ka la khang ban iaid ki kali heh bad kiba khia namar ba ka shim lypa ia ki sienjam ban iada na ka jingsynjor ka dam, kaba dei kawei ka thymmei pynmih bording ha ka jylla namar ba lada jia ba twa katei ka dam, ka jingkordit kaba shyrkhei ia ka jylla.
Don ki nongniah kiba pyrshang iaid jubor na jingkieng dam haba la shna gate
