Shillong: Na ka bynta kito ki briew na ri Bangladesh, ka jaka rung kaba suk bha sha Meghalaya bad kane ka long shu siew tang T.8500 la ioh rung suk jai sha Meghalaya.
Ia kane la phla ki 8 ngut ki briew na Bangladesh kiba la shah bat ha ki pulit ka Railway Police (GRP) ha New Bongaigaon Railway Station ha Assam halor ka jingrung brain sha India ha ka sngi Baar.
Kine ki 8 ngut ki dei ba la tip kyrteng kum u Babu Sheikh, Ashfaqul Haque, Alamin Ali, Mamun Sheikh, Mohammad Ali, Ruhul Amin, Musharraf Ali, bad u Asharul Haque na Jamalpur district ha Bangladesh.
Katkum ka jingiathuh kiba shah kem, kila rung lyngba sha India lyngba ka Meghalaya da ka jingthmu ban leit trei sha Chennai.
Kila phla ba ki hap ban siew kumba T. 8,500 marwei na khappud ka Meghalaya da ka jingiarap ki briew ban ioh rung bad ka don pat ka kynhun kaban wan shimti ban ialam ia ki shisien ba la rung sha Meghalaya.
Siew T. 8500 la ioh rung suk jai sha Meghalaya na Bangladesh
