Shillong: Ka sorkar jylla ka la pyntip ha ka Meghalaya High Court kan jynrat bun ki dieng bah ha khlaw ha Lawsohtun kiba pynwit na ka bynta ban pyniaid ia ka Ropeway Cable Car na Lum Shyllong sha Laban.
Ia kane ka Shillong Peak Ropeway Cable Car Project, la wanrah ka tnad jngohkai ka jylla.
Kane ka jingpyntip ka la paw ha ka sien shong bishar ka High Court mynta ka sngi halor ka Public Interest Litigation (PIL) kaba la ujor da u bah Geraldine G. Shabong, uba la kdew ba ka jingthmu ban pynkhyllem ia ki dieng ka dei ka jingktah jur ia ka mariang bad ka jinglong jingman ki sawdong sawkun ha katei ka thain.
Katkum ka kaiphod kaba la aiti ka sorkar ha ka Kashari High Court, Meghalaya ha ka 18 tarik Naitung, 2025, la ioh jingbit ban pynkhyllem ia ki dieng na ka tnad khlaw ka sorkar India. Ka kaiphod ka la ong ruh ba ka sorkar jylla kan buria kylla ia ka jaka ban thung dieng sha ka sorkar India. Hynrei na ka liang u nongiasaid jong u bah Geraldine G Shabong, u K Paul ula iasaid nia ba ka jingai bujli jaka ka sorkar jylla ia ka sorkar pdeng sha kawei pat ka district ka bym dei ha kane ka East Khasi Hills, kam don jingmut ia ka jingshah pynjot ki khlaw ha Lawsohtun.
Shwa ia kane, ka Kashari ka la bthah ia ka State Level Committee ban peitngor ia ka jingpynkyllem ia ki dieng. Ka kynhun nongbishar ba kynthup ia u Chief Justice I.P. Mukerji bad u Justice W. Diengdoh, ka la bthah ia ka Committee ban long kiba pyni da ki kam ym ban khynniat ia ka jingkitkhlieh sha ki ophisar barit baria jongka tnad khlaw.
Ka kashari ka la shah ruh ia u nongujor ban pule bniah ia ka kaiphod jong ka sorkar bad ban ai ka jubab halor jongka, ha ka sien shong bishar biang kaban long ha ka 30 tarik Naitung.
Ki dieng ba pynwit yn jynrat ban shna Ropeway na lum Shyllong sha Laban, ong ka sorkar ha ka Kashari
