Shillong: U MLA uba dei ruh u myntri ka tnad pule puthi ka jylla u Rakkam A Sangma ula kyntu ia ki MLA bad khamtam ia u nongialam ka liangpyrshah ba kin pyndonkam bha ia ka MLA skhim kumba leh ma u, na ka bynta ka jingmyntoi ki paidbah ka konstitwensi.
Haba kynthah ia u nongialam ka liangpyrshah u Dr. Mukul Sangma uba la kynthah ia ka sorkar halor ka jingbym pynbha ia ki skul ha Garo Hills, u Rakkam ula ong ba kan bha ia u Dr. Mukul ba un leit peit kylleng ki skul ha ka thain ba un iohi, ula leh aiu ha ka por ba u long myntri rangbah jan dap 10 snem.
U Rakkam ula ong ba dei hadien ba la wan ka sorkar thymmai hapoh ka jingialam u myntri rangbah u Conrad K Sangma ha u 2018 ba ka sorkar ka la shim ia ka sienjam ban tei thymmai ki skul sorkar kiba la shu jot rathai bad la shu ieh bun snem.
Ula iathuh ruh ba kum u MLA, ula pyndonkam bha ia ka MLA skhim ban pynbha iaki skul ha ka konstitwensi jong u bad ula kyntu ia kiwei ki MLA bad ia u Dr. Mukul ba un bud bad peit nuksa na u ha kaba iadei ka jingpyndonkam thikna ban pynbha ia 45 tylli ki skul ha ka konstitwensi jong u na ka MLA skhim kaba T. 2.5 klur ha ka shi snem.