Shillong: Ka sor Shillong kaba rit bad ka bym jngai ban iaid, ka iahap bha ban kamai da ki kali ilektrik namar ba kan pynduna ia ka jinglut jingsep bad kan wanrah ruh ia ka jingkhuid jingsuba.
U Vice President ka kompeni Ernst & Young LLP, u Shobhit Saxena ula ong ba kane ka kompeni ka ai jingkyrshan ia ka tnad pyniaid kali ha sor Shillong ban sorjamin ia ki lad ki lynti ban pyniaid da ki kali ilektrik bad ban buh ia ki jaka pynbam ne charging station ha kylleng ki jaka ha Shillong.
Katkum ka jingong u Saxen, la dep jied 24 tylli ki jaka pynbam ne charging station ha nongbah ia ki kali rit bad ki bos ruh. Ki jaka ban buh jaka pynbam ki long ha jaka ieng kali ka Municipal, ha ki hotel, ha ki shopping complex bad la ai jingmut ban pyntreikam ruh da ka Public Private Partnership (PPP) Mode ban buh ia kine ki jaka pynbam ilektrik ia ki kali ne charging station.
U la ong ba ka lawei ki kali ilektrik ha Meghalaya ka long kaba phyrnai bha ha kaba ka ri ka la buh thong ban pynkylla kali ilektrik ia ki kali baroh ha 2027. Ka sor Shillong ka don ka lad kaba biang bha ban pyniaid da ki kali ilektrik namar ba ka jan ban kamai hapdeng sor, bad kan pynduna ia ka jingjaboh. Ula ong ba ka donkam ban pynkylla kali ilektrik ia ki kali kum ki bos, ki ar shaka, ki saw shaka ruh.
Ha kajuh ka por, u Saxena ula iathuh ba ka MUDA ka la pynbuh ne order 50 tylli ki bos ilektrik kiban thied ban pyniaid ha ka Shillong bad kine kin sa wan poi hadien 6-7 bnai.
U la ong ba ki kali ilektrik kim don jingeh eiei ban iaid ban mareh ha kane ka jaka ba long lum ruh namar ba sha thain Ladakh ruh ki la pyniaid da ki kali ilektrik.
Hap pynkylla electric ki kali petrol & diesel, ka Shillong ka iahap ban kamai da ki kali ilektrik, ong u VP ka Young LLP
