Shillong: U tyngshop uba dei ruh u nongshna phlim ba pawnam ka Bollywood u Aamir Khan, ula don ka jingpynkhreh ban shna ia ka phlim halor ka jingshah pyniap u Raja Raghuvanshi ha Meghalaya.
Kane ka sienjam ba u Aamir Khan ula pynkhreh ka long hadien ba la jop ka phlim jongu, ka Sitaare Zameen Par.
U Aamir Khan u dang pule bniah ia ka jingjia ha Meghalaya ha kaba ka Sonam Raghuvanshi ka la sylla ban pyniap ia la u kurim ha ka thain Sohra ha ki khyndiat bnai ba la dep.
Ka thymmei khubor, ka la iathuh ba u Aamir Khan ula dang lum bad kynshew bha ia ki jingtip halor kane ka jingjia ha thain Sohra. Hynrei um pat pynpaw pyrthei, la un shim bynta hi ne em ha kane ka phlim kaba un shna halor ka ‘Meghalaya Murder Case’ bad un sa pynpaw paidbah pat ha ki khyndiat bnai ban sa wan.
Ka jingshah pyniap u Raja Raghuvanshi ka la pynsuhjer ia ka pyrthei bad ka ri India baroh kawei.
U Raja ula wankai bad ka kurim jongu, ka Sonam Raghuvanshi hadien ba la dep iathoh ha ka thain Sohra hynrei kila la jah klep katba dang wan phai na Nongriat ha ka 23 tarik Jymmang hynrei hadien ba la lap ia ka met u Raja ha ka 2 tarik Jylliew 2025 na arliang riat, kaba hap ha Wei Sawdong, katba ka Sonam ka la jah klep.
Ki pulit kila suba jur ia ka lok halor kane ka jingiap u Raja bad kila thwet ia ka bad dei ha ka 8 tarik Jylliew, ka Sonam ka la wan pyndem hi ha ki pulit ha Ghazipur, Utter Pradesh. Katkum ki pulit, u Vishal Singh Chauhan, u Akash Rajput, bad u Anand Kurmi ki dei ki gang ba la pyndonkam ka Sonam ban pyniap ia u Raja ryngkat ka jingiasylla bad u samla jongka, u Raj Singh Kushwaha.
Na arliang riat ha Wei Sawdong, ki pulit kila ioh kurup ruh ia ka mobile ba la pynpra, ar tylli ki wait lyngun ba la pyndonkam ban mait ia u Raja.
Pynkhreh u Aamir Khan ban shna phlim ia ka Sonam bad u Raja
