Shillong:Ka Sorkar Jylla ka dang pyrkhat ba kan khmih biang bad pynkhlaiñ shuh ïa ka aiñ ba la don lypa jong ka Jylla, ka Meghalaya Residents Safety and Security Act (MRSSA) lane kan wanrah pat da kawei ka aiñ na ka bynta ban ïada na ka jingtyllep jong ki briew ba nabar.
Haba kren bad ki lad pathai khubor ha ka Sngi Thohdieng, u Symbud Myntri Rangbah ka Jylla, Bah Prestone Tynsong u la ong ba ka la don kam kyrkieh palat ban don noh da ka aiñ jong ka Jylla ym ban shaniah tang ha ki aiñ ka Sorkar Pdeng.
Haba kylli halor ka jingïohkem ïa ki nong Bangladesh, u la ong ba don ki por ba ki BSF ki ïoh kem na khappud bad don ruh ki por ba la ïoh kem da ki pulit, ha kaba u la ong ba hadien ba la ïoh kem ïa kiba shu wan rung beaiñ hap ban bud pat katkum ki aiñ ka Sorkar Pdeng, bad hap ban phah biang ïa ki sha ki jaka ba ki wan.
U Symbud Myntri Rangbah u la ong ba ki briew ba wan rung beaiñ ym dei tang kiba wan na ki khappud Meghalaya-Bangladesh, hynrei ki wan ruh na kiwei ki Jylla, kum na West Bengal, na Rajasthan bad Bihar.
Dang pyrkhat ka Sorkar ban pynkhlaiñ ïa ka MRSSA ne wanrah noh da kawei ka aiñ ban khang mynder
