Shillong: Ryngkat ka jingther u slap khlem sangeh, ka Hima Nongkhlaw lyngba ka Tirot Sing Syiemlieh Death Anniversary Committee ka la rakhe ïa ka lyngkhuh sngi ïap ba 190 jong ka khlawait u Tirot Sing Syiem ha ka 17 tarik Naitung kumba ju long man u snem.
Ha kajuh ka por ka Hima ka la rakhe ruh ïa ka jingdap 500 snem jong ka jingseng ia ka Hima naduh u snem 1524.
Ha katei ka sngi u wan pynshongkun u symbud myntri rangbah ka jylla u bah Sñiawbhalang Dhar, u bah Paul Lyngdoh myntri ka Arts and Culture, u MLA ka Mairang u bah Metbah Lyngdoh Chairman, State Planning Board, bad kiwei ha shnong Nongkhlaw, ha kaba u Pa’iem P.M Syiemlieh, Syiem ka Hima Nongkhlaw ula pyniaid ia ka jingïalang.
Ïa katei ka Sngi la pyniphuh iphieng shuh shuh lyngba ka jingshad tynrai ki jingrwai kyrpang bad kiwei kiwei na ki khun ki hajar ka Hima.
U bah Sniawbhalang ula ong ba lada ym don ki riewkhraw kiba kum u Syiem Tirot Sing yn ym long kumne kumba long mynta, bad ula kyntu ia ka pateng ba kin ym dei ban pynlong ia kane ka Sngi tang kum ka jingrakhe hynrei ban bud ia ki dienjat Jong ki khla wait kumno ban buh bynta na bynta ka pateng ban wan.
Katba U Bah Paul Lyngdoh ula ong ba ha u 2026 kan long ka lyngkhuh sngi kaba 200 snem ka jingkiew u Tirot Sing ha ka khet kum u Syiem ka Hima Nongkhlaw bad ka Sorkar lyngba ka tnad Arts and Culture bad Tourism kan iaid shakhmat na ka bynta ki jingdonkam ba kyrkieh jong ka Museum bad ka Krem Tirot bad ula pynbna ruh ban theh sa 6 klur na ka bynta ki jingtrei kiba dang sah.
Ryngkat ka jingther u slap kynmaw burom ka Hima Nongkhlaw ia u Khlawait Tirot Sing
