Shillong: Hadien katto katne sngi ba ka longkmie na Russia ka Nina Kutina kaba lap na krem ha khlaw Gokarna kaba don ha Karnataka ryngkat 2 ngut ki khun jongka, u lok barim jongka uba dei na ri Israel, ula dawa na ka ain ban ai bynta lang ia u ban ri ban sumar ia ki khun, da kaba ong ba u kwah ban long u kpa jongki.
U Dror Goldstein (38), uba sah kumba 6 bnai ha Goa, uba dei u kurim barim ka Nina ula ong ba u la pyllait san shyieng na ka Nina (40) la ar snem bad um khlem iakynduh shuh ia ki hadien ba kala ialam ia ki 2 ngut ki khun kynthei jongka sha Goa la katto katne bnai mynshwa.
Ha ka jingshisha, u la ong ba ula iakynduh ia ka Nina ha rud duriaw ha Gokarna hynrei ka Nina kam kam shah ia u ban iadon lang bad ki khun namar ba u la iashong iakhlad.
U Dror ula ong ba ula iakynduh ia ka Nina ha Goa ha 2017 bad kila iasah lang, leit lang sha India bad sha Ukrain haduh ba kin iapyllait san shyieng noh.
Ula ong ba ula mih na India ha u bnai Lber mynta u snem bad namar ba ka don ka thma, um ioh lad ban wan biang.
Hadien ba ula iohi ia ka khubor ba la lap ia ki na krem ha khlaw, ula wan wut da ka liengsuin sha Bengaluru ban iakynduh ia ki. Katkum ka jingong u Dror, ka Nina ka kwah ban ri hi ia la ki khun.
Ula iathuh ba ka Nina ka la ong ia u ba lada um iashong iasah lang, um dei ban ktah ia ki khun.
Haba u mih na Goa katto katne bnai mynshwa, u Dror u la ong ba ula ujor ejahar ia ka jingjah jongki ha ki pulit.
Mynta u la pynpaw ba u kwah ban ioh bynta ioh bhah lang ban peit ban sumar ia kine ki khun ne kaba ki ong ha ka ktien phareng kum ka share custody.
Ula ong ba ula kyrshan ia ka Nina naduh ba ka kha ia I khun kynthei ba nyngkong, ha kaba u ai pisa man u bnai bad ula wan sha India ban iapyllut por 6 bnai bad ki namar ba u don kiwei ki kam namar ba ka visa ruh ka long tang 6 bnai.
U Dror ula ong ba ka khun baar la kha ha India bad ka Nina ka la im hangne kumba san snem bad katkum ka jingsngewthuh jongu, ka khun baar I Ama I dei I nongshong shnong ka India bad ym dei ban pynrangpar sha Russia.
Lah ban kdew ba ia ka Nina bad ar ngut ki khun, ia Prema (6) bad i Ama (4), la lap na ka krem ha ka khlaw ba rben ha u lum Ramatirtha hills ka Kumta taluk, Karnataka ha ka 11 tarik mynta u bnai.
Kila sah ha katei ka krem kumba 3 taiew eiei da kaba bam tang da ki chip bad ia ki, la lap ki pulit ha ka por ba leit jurip ia ka jingtwa ha katei ka thain.
Haba kren sha ki lad pathai khubor, ka Nina ka la pynpaw ba kam dei kaba shisha kumba la pynmih ha ki lad pathai khubor shaphang ka jingim jongki ha krem.
Hadien ba la wanrah ia ka sha jaka ban pynsah na katei ka krem, ka la ujor ruh ia ka jingbym biang ka rukom ai bam ha katei ka jaka kaba la wanrah ia ka bad ki khun namar ka la ong ba ka long kaba jaboh, bad ka ioh tang da ka jaka suda. Ki tiar ki tar jongka ruh la shah rah lut kynthup u dpei jong u khun jongka ba la 9 snem uba la khlad khyndai snem mynshwa.
Kwah u kurim ban sumar lang ia ki khun ba lap na krem bad ka kmie
