Shillong: Ka Meghalaya High Court ka la pynjlan ia ka por shong die madan ha ka thain Khyndai Lad khnang ba ki nongdie madan kin lah ban lum ban lang ia ki tiar ba ki la phriang.
Hadien ba la ujor ka Meghalaya and Greater Shillong Progressive Hawkers and Street Vendors Association, ka Kashari ka la pynkylla ia ka hukum jongka da kaba pynjlan ia ka por na 12 noon haduh 2:15 PM bad ha ka por janmiet naduh ka por 7 PM haduh 9:15 PM.
Ha ka hukum mynshwa, ka Kashari ka la ai por 12:30 PM haduh 2 PM bad 7:30 PM haduh 9 PM.
Ka kynhun ki nongbishar ba kynthup ia u Chief Justice I.P. Mukerji bad u Justice W. Diengdoh, ha ka hukum mynta ka sngi, kila sngap ia ka jingiasaid nia ha kaba na ka liang ki nongiasaid ki nongdie madan, kila pynpaw ba ka jingkhim por ka la ktah ia ka die ka thied jongki katba ki nongiasaid na ka sorkar, kila pyni nia ba ka sorkar ka la pynbiang ia ki jaka ban pynshong ia ki nongdie madan ha MUDA Complex, MUDA Parking Lot ha ka mala ba nyngkong bad ha jaka ka Shillong Municipal Board pyrshah ka SBI Main Branch.
Haba pynmih ia ka hukum hadien ba la sngap ia ka jingiasaid, ka Kashari ka la bthah ba ka jingdie madan ka dei ban hap ha ka jingpyrkhing hapoh ka jingpeit ki bor sorkar bad u Special Officer. Ka la bthah ruh ba ka tnad pyniaid kali ba kin phah kham bun ki pulit ha katei ka thain ban pyniaid beit ia ka leit ka wan ki kali ban ym wanrah ka jingthut ia ki paidbah ha ka por ba die madan.