Shillong: Ka longkmie na ri Russia bad ar ngut ki khun kynthei kila pynkyndit ia ki briew hadien ba ki pulit kila lap ba ki sah hapoh krem la kumba ar taiew.
Kine shi kmie shi khun ki la sah hapoh krem ha u lum Ramateertha Hills ha Gokarna, ha Uttara Kannada district ka Karnataka.
Ia kane ka longkmie la ithuh kyrteng kum ka Nina Kutina kaba khot sin kum ka Mohi. Katkum ki pulit, ka wan sha India da ka visa kam khaïi pateng kaba la kut por naduh u snem 2017.
Kane ka kmie lem bad ki khun, ka Preya (6) bad ka Ama (4), kila mih na Goa sha jaka mane ha Gokarna, kaba la ju tip kum ka jaka duwai kaba kham jylliew bha ha ka kynja mynsiem.
Kine baroh lai ngut kila sah ha katei ka krem kaba ker sawdong da ka khlaw ba rben bad ki kynja riat. La iathuh ba ka Mohi ka la pyllong ia katei ka krem kum ka jaka mane da kaba buh da ka dur Rudra idol bad ka la leh Puja bad ka jingpylleit jingmut hapoh mynsiem.
Ki pulit kila lap ia kine ha kane ka sngi Thohdieng hadien ba ka la don ka jingtwa ha katei ka thain.
U Police Inspector u Sridhar bad ka kynhun kila iohi ia ki jain kiba thad sngi ha katei ka jaka shabar ka krem bad kila leit ban peit ha katei ka jaka kaba rben khlaw ha Ramatirtha Hill bad kila kyndit ban lap pynban ia kine ki lai ngut.
U SP ka Uttara Kannada u M Narayana ula ong ba ka long kaba lyngngoh kumno ki im ha katei ka khlaw, da ei ki ia bam bad sngewnguh pat ba kam don kano kano ka jingjia ba sniew ia ki.
Ki la pyndonkam da ka plastic ban siang thiah bad bam da ki noodle.
Ka Mohi ka la iathuh ha ki pulit ba ka passport bad ka visa jongka ki la jah ha khlaw hynrei ki pulit kila ioh tam biang ia ki najan ka krem ba ki sah.
La pynkit noh ia ki sha ka ashram bad ki pulit ki dang pynbiang ia ki jingdonkam ban phah biang sha ri Russia.
Hapoh krem sah ka longkmie bad ki khun ar taiew kynthih
