Shillong: Ka SpaceX Dragon spacecraft kaba kit ia u nongkiew haw haw ka India u Shubhanshu Shukla bad 3 ngut kiwei pat ha ka Axiom-4 mission kila hiar khyndew ha ka rud duriaw ha California, USA, ha ka por 3.01 pm IST ha ka sngi Baar ka 15 tarik Naitung.
Kane ka shim por 22 kynta shiteng na International Space Station (ISS) kaba sdang ha ka por 4.50pm IST ha ka sngi Nyngkong. Kane ka kynhun ka la don 18 sngi ha haw haw bad ka la leh kumba 60 tylli ki jingwad ne experiment.
Ia kane ka kynhun la ialam u Group Captain u Shubhanshu Shukla na ka Indian Space Research Organisation (ISRO), ka Ax-4 spacecraft kaba khot ka ‘Grace’ — kiba la hiar khyndew ha Pacific Ocean, la ong ka NASA.
Ki lieng kila leit shaw ia ki na jaka hiar khyndew ha katei ka duriaw kaba jylliew bad kila leh ia ka medical check up ia ki hadien ba kila dem ha khyndew.
Ki Helicopter kila leit kit pat ia ki sha ki jaka ba kin pyniahap pat ialade bad kane ka mariang katto katto katne sngi hadien ba kila wan shang na haw haw.
Kane ka jingwan dem khyndew jongki, ka iasyriem bad ka nongher haw haw mynshwa ka Sunita Williams bad u paralok jongka, u Butch Wilmore ha u bnai Lber hadien khyndai bnai. Ka SpaceX jongki ka dei kaba khot kum ka ‘Freedom’, ha kaba ka la dem khyndew ha Atlantic Ocean hajan ka rud duriaw ka Florida, USA.
U myntri rangbahduh ka ri u Narendra Modi ha ka social media, ula thoh ba ryngkat ka ri baroh kawei, u pdiang sngewbha ia u Group Captain u Shubhanshu Shukla ha ka jingwanphai biang jong u sha ka khyndew na haw haw ha ka thong jongu kaban sah kynmaw junom. U Modi u la ong ba kum u nongher haw haw ba nyngkong ka India ban leit jngoh ia ka International Space Station, ula ai mynsiem ia ki milian lyngba ka jingaiti, ka jingshlur bad ka jingprat lynti jong u. Kane kan wanrah sa kawei pat u mawmer ha u khun bynriew ha ka thong sha haw haw.
Na ka bynta lai ngut kiwei ki bym dei na ka ri America, kynthup ia u Shubhanshu Shukla na India, u Slawosz Uznanski-Wisniewski na Poland, bad u Tibor Kapu na Hungary, kane kan dei ka jingkynmaw na ka bynta ka ri jongki hadien da ki phew snem.
Na ka bynta ka India, kane kan dei ka jingiaid shakhmat ha ka thong jongka, ban her sha haw haw dalade ha u 2027 hapoh ka plan Gaganyaan.
Ha kane ka jingleit her jongki sha haw haw na Kennedy Space Center ha ka 25 tarik Jylliew, kane ka kynhun ka la pyllong ia ka jingwad bad lum jingtip halor ki dawai, ka rep ka riang bad ka jingshang ha ka haw haw ban lum jingtip.
Hadien 18 sngi ha haw haw, wan hiar khyndew u Shubhanshu da ka SpaceX Dragon
