Shillong: Ki Nongialam jong ka FKJGP Upper Shillong Circle hapoh ka jingialam jong u Samla Hopewell Kharkongngor Asst.General Secretary ha ka jingiadon ryngkat u Samla Bantei Nongkhlaw, President FKJGP Bañiun Unit, Samla Donkupar Nongdhar, President FKJGP Pomlum Unit mynta ka sngi kila leit Khang kyrdep bad pynher krad lut ia baroh ki Nongtrei jong ka Post Office kaba don ha 7th Mile, Upper Shillong namar ka jing bym kheiñ snep bad ka jing bym burom iaka sngi Beh Dieñkhlam kaba dei ka jinglehniam jong ka jaitbynriew.
Ha kawei pat ka bynta ka FKJGP Shillong City hapoh ka jingialam jong u Samla Arkinfield Khonglam President FKJGP Shillong City kala leit ban khang khyrdep ia ka General Post Office (GPO) kaba don ha ka Nongbah Shillong.
Na ka liang ki Nongialam jong ka FKJGP Upper Shillong Circle bad kumjuh ruh ki Nongialam jong ka FKJGP Shillong City kila pynpaw ka jing bynñiaw halor katei ka bynta. Ha kajuh ka por na ka liang jong ka seng ka phah ruh ia ka kyrwoh sha ki bor jong ka sorkar jylla bad sorkar pdeng ba kidei ban pynmih da ka hukum ia baroh ki shnat treikam ba kidei ban burom ia kino² ki sngi kyrpang bad ki sngi khraw jong ka Jaitbynriew. Ha kajuh ka por ka FKJGP kala maham lypa ruh ba kin sa leh da kaba tyngeh ia ki bym burom ia ka Lyngkhuh sngi iap jong u Khlawait jong ka Jaitbynriew u Tirot Sing ha kaba yn sa rakhe ha ka 17 tarik mynta u bnai.