Shillong: Ki jingthaw ka mariang, ki don ruh ka khana ha lyndet jongki. Kum kine ki don ha ki them bad ki ranab, ki synrang lum ka Hima Lyngiong.
Tang shiteng kynta eiei na Phanniewlahrum, yn lap ha ka wah Lyngiong, ia u Maw Pukhri, uba la oh shrong oh shrup. U don ruh u maw pei thliew hapdeng ka pung uba lah ban jngi kai hapdeng ka pung bad uwei pat ha tdong ka pung, uba lah ban ngiam shi sumo.
Ha ki ranab lum bad ki lum ba jyrngam, ka don ruh ka Dorbar Ki Ksuid. Ha katei ka shynrang kaba ju rieh slap ki masi ki blang, ka ksaid ruh kam ju rngad baroh shi snem. Ka don ruh ka krem u Hai Swer, kaba u ju sah miet hyndai, kaba long kum ka pongshai ne ka jingkhang ïit ban peit na krem shabar.
Ban iaid kai ha katei ka them bad ka synrang ba jyrngam bad iohi shynna bad sha ki wah, kan shem jingeh ia ki briew ban pynkut tang ha ka shi sngi namar ba ka iar bad ka kham pajih watla ka long kaba sngew tynnad haduh katta katta ban iohi ia ka mariang kaba pynkyndeh sawdong.
U Lyngdoh ka Hima Lyngiong, u bah Hamphrey Ryntathiang, ula iathuh ba ka Hima ka sngewnguh ia ka mariang kaba la ai ia ka mariang kaba itynnad. U la iathuh ba ka Hima ka la pynkhreh ia ka concept paper ban leit aiti sha ka sorkar na ka bynta ban pynbha ia ki jingdonkam. Ula kyntu ia ki briew kiba wan kai, ba ki dei ban burom ia ka mariang, ym ban pynjot pynpra.
Kumjuh u myntri ka Hima u bah Ailand Swer ula ong ba kyrpad ia ki briew kiba wan kai, ba kin pyntip sha ki nongpyniaid shnong namar ba ka lynti kam pat long kaba shngain ban leh shlur bad pynshlur ia ki briew ban shu leit hi khlem ka jingialam ki trai shnong.
Ka krem u Hai, Synrang masi, maw puthri, maw pei thliew, ka pyntha ba iar ha Hima Lyngiong
