Shillong: Ka Meghalaya Swimming Association (MSA), ka la shim ia kawei na ki sien jam da kaba ka la lum la lang ia ki kmie ki kpa bad kumjuh ki khynnah, kiba kum ka synjuk ka la dep ba kan jied lypa ia ki, ba kin sdang ban long noh pat kiba la pynkhreh, kum shi bynta ban ioh mihkhmat ia la ka jylla, haba ka pynlong ia ka National Games kaba 39 ha u snem 2027, hangne hapoh ka jylla.
Kat kumba lah ban ioh jingtip ha ka thup pyllait kyrteng ba nyngkong ki don kumba 14 ngut ki shynrang bad 8 ngut ki khynnah kynthei, kiba ia mynta la ibit ia ki ban pynrung sha kane ka thup, ia kaba ka MSA na ka por sha ka por kan dang iai khmih pat ia ka jinglong ka jingman ka rukom ialehkai ka jong ki.
Haba pynbna ia ki kyrteng jong kine, ka MSA ha kane ka jingialang, ka kyntu ia ki kmie ki kpa ba ma ki ruh ki donkam ban ai lem ia ka jingkyrshan kaba radbah ia la ki khun, kum shi bynta ba kin lah lem ban kynjoh ia ka thong.
Nalor katta ka MSA ka la ai ruh ia la ka jong ka maitphang ka jong ka, ba da kumno yn hap ban long kiba la pynkhreh, ia kaba ka jingkmih kaba bniah kan long ruh wat naduh ki coach, ka jinglah ban ialehkai, ka discipline bad kiwei kiwei.
Ia kane ka jingialang la lah ban pynkut da ka jingiakren bad ia syllok iwei pa iwei u/ka khynnah bad ki kmie ki kpa, ha kaba la ioh ia ka lad ban da pynshai bin pa bin, ne ban weng ruh ia kano kano ka jingbym lah ban sngewthuh , nalor katta la ioh ruh ban batai bniah ia ki, ba da kumno ban nang ban mang ne bynta ia la ka jong ka por kum ha kaban pule ia ka kot ban bad kilan ia la ka met, shwa ban kynjoh ia ka thong ban ioh mihkhmat ia ka jylla sha ka National Games 2027.
Na ka liang ka MSA, ka shim ruh ia kane ka kabu ban ai khublei ia ka sorkar jylla, kaba plie lad ia ka synjuk ba kan ioh ia kane ka kabu ban sdang pynkhreh janai ia la ka jong ka kynhun, da kaba ai ruh ia ka song iarap pisa, kaba long kawei na ki kam kiba kane ka jingiarap kan nym kuit tang naka bynta ka jingpynkhreh ia ka National Games, hynrei kan iarap ruh at ban lah ban sei ia ki rang ne thei samla kiban kynjoh sha ka thong ban mihkhmat wat ha ki rynsan iakop ba long ha ka ri ne national bad ha ka pyrthei ne international.
Iasyllok ka seng nongjngi ia ki kmie ki kpa ki khynnah ban pynkhreh ia ka NG 27
