Shillong: U samla Sanborlang Marwein 22 snem ka rta na ka shnong Mawtawar, ula jah mynta la ar bnai thik naduh ka 4 tarik Jymmang.
Ha ka jingiakren bad ka kmie jong u samla Sanborlang, ka kong Brolina Marwein ka la iathuh ba ar taiew shwa ban un phet na iing bad jah rngai, u khun jongka, ula shu lynga pisa kumba ka don ka jingialeh ha ka mynsiem jong u.
U la phet ha ka por kumba 8:30 am bad jah rngai syndon haduh mynta. Na ka liang ka shnong ka thaw, kiba haiing hasem kila pyrshang ban wan hynrei khlem pat lap satia haduh mynta.
Ka kong Brolina ka la ong ba ula phet kynsan na iing kaba don ha Mawtawar Laitlum, da kaba mareh sha khlaw haduh ba kiba haiing kiba leit bud ia u, kim lap dien shuh.
Ka kmie jong u ka la iathuh ba u ong ha ka kum ka kmie, ba don ba leh sniew ia u, balei ka met jong u ka long kumta, bad ula kren ba dei tang ma u uba mad, ba sniew ka nusip.
Kiba haiing kila khuslai bad sah umdum haduh mynta namar ba la jan baroh ki jaka ka thain kaba ula phet shaduh thain Bhoi bad kiwei ki jaka, kila pyllong ia ka jingwad.
Ka kmie ka la iathuh ba u khun jongka, u la ju mareh step la kumba ar snem kylleng ka sor namar ba u kwah ruh ban long pulit bad ban long u nongmareh uba khlain bha.
Ka la phah duwai ha ki nongsharai Balang ruh na ka bynta ba un wan phai biang sha la iing hynrei khlem pat wan satia haduh mynta.
Ula pynpaw ha ka kmie ba ka shadem ka sngew syier, ka sngew lynga bha.
Ka la iathuh ba ha ka por ba u phet na iing, u khlem rah satia ia ka mobile phone hynrei u rah tang kawei ka jain ha met.
Kum ka kmie, ka la kyrmen ba u Blei un ri un sumar ia u bad ka la kyntu ia la u khun ba un wan phai noh sha la iing.
“U phet na iing ha ka por 8:30am mynstep sha khlaw thain Nongkohlew, Mawsiatkhnam, u shu leh lynga pisa beit shi taiew bad u sngew kumba thar, long kumba tan kumba khem ha ka met. U sngew jaituh ban trei eiei ruh. U ong ban shong ha iing ruh um sngew juh shuh, u mut leit sha shnong ngam shah. U leit sah kai ha iing hymmen ar miet bad ula wan biang bad u ong um juh shuh ban sah ha Mawtawar, u kit ia ka jain u phet sha Kyntonmawssar bad hadien ba la khroh ula wan phai biang. La ialam ban phah duwai sha u Pastor, uba la iathuh ba une u khynnah u shah tap ha ka jingdum. Hadien ba u la jah kumba shi taiew, la leit phah duwai bha ha Pastor bad ula iathuh ba une u khynnah ula phet jngai bha bad un sa wan phai”, la ong ka kmie u samla Sanborlang.
2 taiew shwa ban phet na iing, shu lynga pisa u samla Sanborlang
